Рөстәм Миңнеханов Дубайда дөньядагы иң зур азык-төлек сәнәгате күргәзмәсендә катнаша

Татарстан Рәисе Рөстәм Миңнеханов Дубайда уза торган дөньяда иң зур Gulfood азык-төлек сәнәгате күргәзмәсе чараларында катнаша. Бу хакта ТР Рәисе матбугат хезмәте җитәкчесе Лилия Галимова хәбәр итте.

Ел саен Gulfood 125 илдән 5 меңнән артык компанияне җыя һәм 130 меңнән артык кеше кабул итә. Күргәзмәнең гомуми мәйданы 200 мең квадрат метрдан артып китә.

Татарстан Gulfoodта 2021 елдан бирле катнаша. Күргәзмә тармакта партнерлык элемтәләрен җайга салу өчен нәтиҗәле корал булып тора һәм Татарстанның агросәнәгать комплексы продукциясен экспортлауны арттыруга ярдәм итә.

Рөстәм Миңнеханов Россия авыл хуҗалыгы министры Оксана Лут белән бергә Dubai Expo City да Россия милли стенды ачылышында булды.