Денис Макаров «Кайсериспор»га ўтди ва жадвалдан чўчимади

Ҳужумкор ярим ҳимоячи Денис Макаров Москванинг «Динамо»сини тарк этиб, Туркиянинг «Кайсериспор» жамоасига қўшилди. 27 ёшли футболчи трансфер бўйича қарор қабул қилаётганда клубнинг турнир жадвалидаги ҳолати унга босим қилмаганини айтди. Ҳозирда «Кайсериспор» Суперлига жадвалида 17-ўринда, яъни сўнгги поғоналардан бирида бормоқда. Бу ҳақда euro-football.ru хабар беради.

Макаровнинг таъкидлашича, аксинча, бундай вазият унга қизиқарли синов бўлиб кўринган: у учун энг муҳими майдонда мунтазам ўйнаш, жамоага фойда келтириш. Футболчи оғир паллаларда айнан ҳар бир ўйинчининг характери намоён бўлишини қайд этди.

«Кайсериспор» навбатдаги учрашувини якшанба, 1 февраль куни сафарда Туркиянинг амалдаги чемпиони «Галатасарай»га қарши ўтказади. Ўйин 22:00 да (Тошкент вақти билан) бошланади.