Крис Кавана АПЛ ўйинларини бошқаришдан четлатилди
Англиялик ҳакам Крис Кавана яқин ҳафта охирида Англия Премьер-лигасидаги учрашувларни бошқармайдиган бўлди. Бунга унинг Англия Кубогида «Астон Вилла» — «Ньюкасл» ўйинидаги баҳсли ва сифатсиз ишлаши сабаб сифатида кўрсатилмоқда. Бу ҳақда euro-football.ru хабар беради.
Учрашув давомида Кавана бир нечта жиддий хатога йўл қўйгани айтилади: офсайддан урилган «Астон Вилла» голини ҳисобга олди, Люк Динни майдондан четлатмади, шунингдек, «Ньюкасл» фойдасига пенальти белгиламади.
Қайд этилишича, бу эпизодлар VAR тизими йўқлиги фонида юз берди. Видеоассистент ҳакамлар тизими Англия Кубогининг кейинги — бешинчи раундидан бошлаб қўлланади. Шунга қарамай, Кавана бундай ёрдамчисиз ҳам қарорларни аниқ чиқариш масаласида хулосалар қилиши керак.