Оскар Руджери Каванига футболни тўхтатишни тавсия қилди

Уругвайлик ҳужумчи Эдинсон Кавани Аргентинада жиддий босим остида қолмоқда. «Бока Хуниорс» мухлислари уни тез-тез ҳуштакбозлик билан қарши олмоқда, футболчи эса баъзан умуман майдонга тушмаяпти ёки учрашув якунига етмасдан алмаштирилмоқда. Бу ҳақда euro-football.ru хабар беради.

Аргентина футболининг собиқ юлдузи Оскар Руджери бундай муносабатни Каванининг обрў-эътиборига зид, камситувчи ҳолат деб баҳолади. Унинг фикрича, катта тажриба ва номга эга футболчи учун энг тўғри йўл — шу тарзда давом этмасдан, фаолиятни якунлаш.

«Бундай тажрибага эга ўйинчини шундай аҳволга солиш — ҳақорат. Шундай бўлгандан кўра, футболни тўхтатган маъқул», — дея Руджерининг сўзларини derbyderbyderby.it келтирди.

Эслатиб ўтамиз, Кавани аввалроқ «Наполи», «ПСЖ» ва «Манчестер Юнайтед» каби клубларда ҳам тўп сурган.