Фрэнк Лэмпард “Ковентри”ни 25 йилдан сўнг АПЛга қайтарди

"Ковентри Сити" бош мураббийи Фрэнк Лэмпард раҳбарлигида тарихий натижа қайд этди — жамоа 25 йиллик танаффусдан сўнг яна Англия Премьер-лигасига йўл олди. Клуб сўнгги марта 2001 йилда элита дивизионида иштирок этган эди.

Лэмпард қўл остида “Ковентри” муддатидан олдин АПЛ йўлланмасини қўлга киритди. Энг қизиғи, мураббий жамоага келганида у Чемпионшип жадвалида фақат 17-ўринда бораётган, натижалар эса умидсизроқ кўринаётган эди. Бироқ атиги 1,5 йил ичида у клубни тубдан ўзгартириб, элита сафига олиб чиқди.

Мураббийнинг тактик ёндашуви, интизом ва ишончга асосланган тизими жамоа натижаларини кескин яхшилади. Шу сабабли “Ковентри”нинг бу муваффақиятида айнан Лэмпарднинг ҳиссаси ҳал қилувчи омил сифатида кўрилмоқда. Клуб ва мураббий ўртасидаги ҳамкорлик кутилганидан ҳам самарали чиқди.

Айни пайтда жамоа Чемпионшипда ишончли етакчилик қилмоқда. “Ковентри” иккинчи ўриндан 11 очко фарқ билан илгарилаб кетган ҳолда чемпионликни ҳам деярли кафолатлаган ҳолатда кўринмоқда.

Шу билан бирга, инглиз ОАВларида Лэмпардга "Челси" томонидан қизиқиш билдирилаётгани ҳақида хабарлар тарқалмоқда. Агар лондонликлар расмий таклиф билан чиқса, мураббий учун қарор қабул қилиш осон бўлмаслиги айтилмоқда.

Ҳозирча эса Лэмпард “Ковентри” билан тарих ёзмоқда ва клубни узоқ кутилган Премьер-лига саҳнасига олиб чиқиш орзусини амалга оширди.