Россияда сунъий интеллект ёрдамида космик шаҳар модели яратилади
Россияда узоқ коинот шароитида ҳаёт кечиришни моделлаштиришга мўлжалланган шаҳарнинг рақамли эгизагини яратиш лойиҳаси бошланди. Ушбу тизим сунъий интеллект ёрдамида қурилади ва Ой ҳамда Марс муҳитига максимал даражада яқинлаштирилган шароитларни акс эттиради. Бу ҳақда Ixbt.com хабар беради.
Озиқ-овқат концентратлари саноати илмий-тадқиқот институти вакили Андрей Ведерниковнинг сўзларига кўра, лойиҳа коинот миссиялари учун озиқ-овқат ишлаб чиқариш сценарийларини олдиндан ишлаб чиқиш имконини беради. Бу реал тажрибалар ўтказилишидан аввал юзага келиши мумкин бўлган хатоларни аниқлашга ёрдам беради.
Виртуал муҳитда мутахассислар маҳсулотларни етиштириш, сақлаш ва чиқиндиларни қайта ишлаш каби тўлиқ циклни синовдан ўтказадилар. Шунингдек, экипаж аъзоларининг маданий хусусиятлари ва одатларини ҳисобга олган ҳолда овқат тайёрлаш жараёнлари ҳам таҳлил қилинади.
Лойиҳа келажакдаги экспедитсияларнинг асосий вазифаларидан бири — инсонларни автоном тарзда озиқ-овқат билан таъминлаш масаласини ҳал этишга қаратилган. Рақамли шаҳар коинотни ўзлаштиришда муҳим технологик база бўлиб хизмат қилади.