Қазақстан Грузия арқылы мұнай тасымалы көлемін ұлғайтуға ниетті
Қазақстан Грузия арқылы мұнай тасымалы көлемін ұлғайтудыға ниетті, деп хабарлайды Tengrinews.kz Ақорда баспасөз қызметіне сілтеме жасап.
Бұл туралы Қазақстан Президентінің Астанаға ресми сапармен келген Грузия премьер-министрімен келіссөздері барысында белгілі болды.
Қасым-Жомарт Тоқаев Қазақстанның Оңтүстік Кавказдағы уақыт тезінен өткен сенімді серіктесі Грузиямен арадағы достық қатынастарды бағалайтынын атап өтті.
Сондай-ақ Президент бүгін қол қойылатын Стратегиялық серіктестік орнату жөніндегі бірлескен мәлімдеме қазақ-грузин қарым-қатынасын жаңа әрі сапалы деңгейге көтеретініне сенім білдіріп, сауда-инвестициялық ықпалдастық екі ел байланысының өзегі саналатынын айтты.
"Жаһандағы тұрақсыздыққа қарамастан тауар айналымын ұлғайтуға мүмкіндік мол. Қазақстан Грузия экономикасына жарты миллиард доллардан астам инвестиция салды. Әрі аталған елдің ірі инвесторларының қатарына кіреді. Мемлекеттеріміз энергетика секторында табысты ынтымақтастықты жолға қойды. Біз Баку – Тбилиси – Джейхан құбырымен мұнай тасымалы көлемін ұлғайтуға ниеттіміз. Сауда-экономикалық ынтымақтастық жөніндегі үкіметаралық комиссия аясында белсенді жұмыс атқарылып жатыр. Бүгінгі кездесу келешектегі жаңа басымдықтарды айқындауға септігін тигізеді деп үміттенемін", – деді Қасым-Жомарт Тоқаев.
Тараптар өзара тиімді инвестициялық жобаларды жүзеге асыруға мүдделі екенін растады.
Ақорданың баспасөз қызметінің фотосы
"Транскаспий халықаралық көлік бағдарының негізгі қатысушылары ретінде екі ел көлік-логистика инфрақұрылымын дамыту, контейнерлік тасымал көлемін кеңейту, тариф саясатын үйлестіру және цифрландыруды үдету бағытында дәйекті шаралар қабылдауға ниетті", - деп атап өтті Ақорда баспасөз қызметі.
Анықтама: Соңғы бес жылда Орта дәліз арқылы тасымал көлемі 3,5 есе өскен. 2029 жылға қарай аталған бағдар бойынша қатынайтын контейнерлік пойыздар саны 3 мыңға жетеді деп күтілуде. Қазақстан Батуми портынан бөлек, Грузияның басқа да теңіз айлақтарына кіруге мүдделі. Өткен жылы қазақстандық инвестордың қатысуымен Поти портында жаңа мультимодальді терминал ашылды. Анаклия порты – өңіраралық байланысты нығайту тұрғысынан қызықты жобаның бірі саналады.
Цифрландыру мен жасанды интеллект өзара ынтымақтастықтың перспективті салаларының қатарында аталды
Тоқаев Тәуелсіздік сарайында Грузия премьер-министрін қарсы алды