“Сквиш сатып алып, ауруханадан бір-ақ шықтық“. Ата-аналарға танымал ойыншықтың қаупі ескертілді
Не болды?
Әлеуметтік желілерде жеті жасар қызы тап болған жазатайым оқиға туралы айтқан қазақстандық келіншектің видеосы тарады.
Әйелдің айтуынша, қыз бала антистресс-ойыншықтың ішіндегі сұйықтықпен жанасқаннан кейін ауыр химиялық күйік алған. Бала ауруханаға жатқызылды, дәрігерлер III дәрежелі химиялық күйік диагнозын қойды.
"Дүкендерде еркін сатылатын және әлеуметтік желілерде белсенді жарнамаланатын антистресс-ойыншықтың ішіндегі сұйықтықтың кесірінен қызым ауыр химиялық күйік алды. Қазір ол ауруханада жатыр. Дәрігерлер III дәрежелі химиялық күйік диагнозын қойды", - деді баланың анасы.
Қазақстандық келіншек барлық медициналық құжат пен ойыншықты сатып алған чекті сақтап қойғанын мәлімдеді. Ол оқиғадан кейін Денсаулық сақтау министрлігіне, Сауда және интеграция министрлігіне, Санитариялық-эпидемиологиялық бақылау комитетіне, Тұтынушылардың құқықтарын қорғау комитетіне, ІІМ, Бас прокуратураға және басқа да мемлекеттік органдарға осындай өнімдерді тексеру туралы өтінішпен жүгінгенін айтты.
Сонымен қатар ол ата-аналарды ойыншық таңдауда мұқият болуға шақырды.
"Бүгін менің қызым зардап шекті. Ертең басқа бала зардап шекпеуі үшін бәріміз бірге қолдан келгеннің бәрін жасайық", - деп атап өтті ол.
Әйелдің айтуынша, тақырыпты зерттей келе, ол осындай жағдайлардың басқа балалармен де болғанын анықтаған.
@user33170269970506 #usa???????? #tiktok #fyp #news ♬ түпнұсқа дыбыс - AngelaBender
Сквиш дегеніміз не?
Сквиштер (ағылшынша squish - "қысу") - қысқаннан кейін бастапқы қалпына келетін жұмсақ антистресс-ойыншықтар. Әдетте олар эластикалық полимерлерден немесе силиконнан жасалып, жануарлардың, тәттілердің немесе мультфильм кейіпкерлерінің пішінінде шығарылады.
@jessyjessjessjessy Тренд расымен де керемет ???? бұл сондай рахат сыйлайды! ???? #squishy #cheesesquishy #vaseline #asmr #fyp ♬ Morning Routine - Neyaraf
Гельді сквиштер ерекше танымалдылыққа ие. Мұндай ойыншықтардың ішінде мөлдір гель, кейде жылтырақтар болады. Оларды тек қысып қана қоймай, созуға да болады, сондықтан олар балаларға өте ұнайды.
@uuyr832 Ғашық болдым ????, Needoh Jelly Squishes#needoh #fyp #tiktokshop ♬ All Sparkles, Like Magic! - Dan Lucore
Мамандар не дейді?
Денсаулық сақтау министрлігі Санитариялық-эпидемиологиялық бақылау комитетінің Техникалық регламенттер талаптарының сақталуын бақылау басқармасының бас сарапшысы Розалина Ермекпаева әрбір ойыншықтың оның қауіпсіздігін растайтын құжаты болуы керектігін еске салды.
Оның айтуынша, көптеген ата-ана ойыншықтарды баланың қалауына ғана сүйеніп, кездейсоқ сатып алады, бірақ бұл қауіпті болуы мүмкін.
"Ойыншықтар - бұл баланың денсаулығына елеулі теріс әсер етуі мүмкін өнім. Сондықтан 15 жылға жуық уақыт бойы Кеден одағының "Ойыншықтардың қауіпсіздігі туралы" техникалық регламенті қолданыста. Ойыншықтың талаптарға сәйкес келетіндігінің дәлелі - сәйкестік сертификаты", - деп түсіндірді сарапшы.
Ол сатушыдан сәйкестік сертификатын міндетті түрде сұрауға кеңес берді. Егер құжат жоқ болса немесе күмән тудырса, сатып алудан бас тартқан дұрыс.
Сарапшы мемлекеттік тізілімнен сертификаттың бар-жоғын өз бетінше тексеруге кеңес берді.
Неліктен сквиштердің бәрі бірдей қауіпті емес?
Ермекпаеваның айтуынша, мәселе заңсыз немесе контрафактілік өнімдерге қатысты болуы мүмкін. Оның пікірінше, дәл осындай ойыншықтардың құрамында химиялық күйік тудыруы мүмкін улы заттар болуы ықтимал.
"Егер ойыншық заңсыз болса, оның құрамында күйік тудырған қауіпті химиялық заттардың болуы әбден мүмкін. Мұндай өнімдер, сірә, міндетті сәйкестікті бағалаудан өтпеген", - деп атап өтті маман.
Ол ойыншықтарды базарлардан және ресми емес сауда нүктелерінен сатып алу кезінде ерекше сақ болу керектігін айтты.
Сатып алу алдында не нәрсеге назар аудару керек?
Маман ойыншықты сатып алмас бұрын оны мұқият тексеруге кеңес берді. Төмендегі жағдайлар одан бас тартуға себеп болуы мүмкін:
сәйкестік сертификатының болмауы;
өткір химиялық иіс;
кедір-бұдыр жиектер, қылтықтар немесе өткір элементтер;
материал сапасына күмән келтіру;
ресми емес сауда орындарынан сатып алу.
Сарапшының айтуынша, тіпті сыртқы тексерудің өзі өнімнің сапасы туралы көп нәрсені айта алады.
"Егер ойыншықтың жағымсыз иісі болса немесе оның жасалған материалы күмән тудырса, мұндай өнімді сатып алмаған жөн", - деп атап өтті Ермекпаева.
Ол балаларға ойыншық таңдауда ересектердің жауапты екенін еске салып, тауардың тек сыртқы түріне ғана емес, оның қауіпсіздігіне де назар аудару маңызды екенін жеткізді.