Абылай Мырзахметов бостандыққа шықты
"Атамекен" ұлттық кәсіпкерлер палатасының бұрынғы төрағасы, екі жыл бұрын алаяқтығы үшін сотталған Абылай Мырзахметов бостандыққа шықты, деп хабарлайды Tengrinews.kz тілшісі.
Павлодар облысы бойынша қылмыстық-атқару жүйесі департаментінің хабарлауынша, сот оны босату туралы шешімді биыл ақпанда қабылдаған.
"Жазасын өтеу барысында Абылай Мырзахметов төрт рет марапатталған, кейінгісін 2025 жылдың қазанында алды. Мінез-құлқының екінші оң дәрежесі және жеңілдетілген жағдайда ұсталуы жазаның өтелмеген бөлігін ауыстыру туралы өтініш түсіруге құқық берді, сотталушы осы мүмкіндікті пайдаланды", - деп хабарлады Павлодар облыстық ҚАЖ департаменті.
Шешімді Павлодар облыстық соты шығарды.
Жазаның өтелмеген бөлігінде, яғни бір жылдан сәл астам уақыт бойы сотталған Абылай Мырзахметов тұрғылықты жері бойынша пробациялық бақылауда болады. Оған тұрақты тұрғылықты жерін ауыстыруға, пробация қызметіне ескертпей облыс аумағынан шығуға және көңіл көтеру орындарына баруға тыйым салынады.
Айта кетейік, Абылай Мырзахметов жазасын Павлодар облысындағы № 46 мекемеде өтеген. 2025 жылдың көктемінде онда биг-бэг қаптарын шығаратын тігін цехы ашылды. Шарадан түсірілген кадрларды бұған дейін Бас прокуратураның Telegram-арнасы жариялаған болатын.
Видеода сотталған Мырзахметов колонияда еңбек етіп жатқанын, онда 2024 жылдың қыркүйегінен бастап бір топ сотталушымен бірге өндіріс ұйымдастырғанын, инвестор тауып, жарты жыл ішінде 120 жұмыс орнын құруға көмектескенін айтқан. Сотталғандар спорттық костюмдер тігіп, ағаш пен металдан бұйымдар жасайды. Қажетті құрал-жабдықтар мен жұмыс орындарын кәсіпкерлер ұсынған.
Павлодар облыстық прокуратурасының мәліметінше, Мырзахметов бірнеше тігін машинасын өз қаражатына сатып алған. Оның өзі де басқа сотталғандармен бірге жұмыс істеп, қап тіккені атап өтілді.
"Сотталған азамат құрған бұл кәсіпорын ол бостандыққа шықса да жұмысын жалғастырып жатыр. Ол өзінен кейін ізбасарын қалдырды. Қазір онда 300-ге жуық сотталушы жұмыспен қамтылған", - деп хабарлады Павлодар облыстық ҚАЖ департаменті баспасөз қызметі.
Еске салсақ, 2024 жылдың мамырында Абылай Мырзахметов аса ірі көлемдегі алаяқтық үшін кінәлі деп танылып, бес жылға бас бостандығынан айырылған болатын. Сондай-ақ ол кәсіпкерді туысын қылмыстық жауапкершіліктен босатуға көмектесемін деген желеумен пара беруге итермеледі деп айыпталған еді.
Сол жылдың шілдесінде үкім заңды күшіне енді. Жаза өтеу мерзіміне Мырзахметовтің қамауда болған уақыты, атап айтқанда 2023 жылғы 10 мамырдан бастап орташа қауіпсіздік колониясындағы бір күн бір жарым күнге тең деп есептелді. Тағайындалған 5 жыл мерзімнің 2 жылы мен 9 айында ол қамауда болды.
2025 жылдың қаңтарында Мырзахметов жазасының қалған мерзімін бас бостандығын шектеуге ауыстыру туралы өтініш берген, бірақ сот бас тартқан. Себебі марапаттардың аздығы болды: судьяның айтуынша, сотталғанның адал еңбегі үшін бір ғана марапаты болған, ал бұл заң бойынша оның міндеті болып саналады.
Абылай Мырзахметов өзін мерзімінен бұрын босату туралы өтінішін қайтарып алды
Абылай Мырзахметов туралы не белгілі?
Абылай Мырзахметов 2013 жылдан бастап "Атамекен" ҰКП-ны басқарды. Оған дейін 2007 жылдан бастап "Атамекен" одағы" Қазақстанның ұлттық экономикалық палатасы" ЗТБ басқарма төрағасы болды. 2022 жылдың ақпанында ол өкілеттігін тоқтатты.
2002 жылы Мырзахметов Көлік және коммуникация министрі қызметін атқарды. Кейін сыбайлас жемқорлық күдігімен қызметінен шеттетілді. 2003 жылы ол бес жылға шартты түрде бас бостандығынан айырылған болатын.
Абылай Мырзахметов әр жылдары вице-премьер, Ауыл шаруашылығы министрі қызметтерін атқарған Жамбыл облысының бұрынғы әкімі Асқар Мырзахметовтің туған інісі.
Forbes 2021 жылы Абылай Мырзахметовті Қазақстандағы ең ықпалды 50 бизнесменнің тізіміне қосты. Басылым мәліметінше, Мырзахметов мақтадан медициналық өнімдер шығаратын "Комбинат "Фараб" ЖШС-нің, сондай-ақ ШҚО-дағы Уба және Ашалы алтын кен орындарын игеретін Altyn Dala Mining ЖШС-нің тең иесі.