2,5 миллиардтық схема: Оңтүстік Корея Қазақстанға күдіктіні тапсырды

Оңтүстік Корея Қазақстанға 2,5 миллиард теңгені қолма-қол ақшаға айналдырды деген күдіктіні экстрадициялады, деп хабарлайды Tengrinews.kz Қаржылық мониторинг агенттігіне сілтеме жасап.

Тергеу мәліметтері бойынша, Байболов Ұлан Мұхтарұлы бюджетке салық және басқа да міндетті төлемдерді төлеуден жүйелі түрде жалтарған ұйымдасқан қылмыстық топтың мүшесі болған.

2,5 миллиард теңгеден астам қаражат қолма-қол ақшаға айналдырылған

Тергеу нұсқасы бойынша, топ мүшелері кәсіпорындарды сатып алып, оларды номиналды басшылардың атына қайта тіркеген, олардың банктік шоттары арқылы қаржылық операциялар жүргізген, салық есептілігіне көрінеу бұрмаланған мәліметтер енгізген, содан кейін ақшаны қолма-қол ақшаға айналдырып отырған.

Тергеу мәліметінше, осы схемада пайдаланылған кәсіпорындардың бірі - "Сфера" ЖШС. Байболов 2014 жылы компания директорының орынбасары болып тағайындалған. ҚМА мәліметі бойынша, топ мүшелері ЖШС-нің есеп айырысу шоттары арқылы 2,5 миллиард теңгеден астам қаражатты қолма-қол ақшаға айналдырған.

Сонымен қатар қосымша есептелген салық сомасы 1 миллиард теңгеден асты.

Сот Байболовқа қатысты күзетпен ұстау түріндегі бұлтартпау шарасын санкциялады. Тергеу жалғасуда. Қазақстанның Қылмыстық-процестік кодексінің 201-бабына сәйкес өзге мәліметтер жария етілмейді.

Еске сала кетейік, бұған дейін ҰҚК Қазақстанда Оңтүстік Кореяның 14 азаматы ұсталғанын хабарлады, олар телекоммуникациялық жүйелерді пайдалана отырып, ұйымдасқан топ құрамында алаяқтық жасады деп күдіктелуде. Кейінірек Оңтүстік Корея БАҚ-тары Қазақстанда өткен ауқымды арнайы операцияның кейбір деректерін жариялады.