Қырғызстанда Қамшыбек Тәшиевтің орнына МҰҚК басшысы лауазымына келетін адам табылды
Қырғызстан парламенті Мақсат Асанәлиевті Мемлекеттік ұлттық қауіпсіздік комитетінің (МҰҚК) төрағасы етіп тағайындауды мақұлдады. Депутаттар бұл шешім үшін бірауыздан дауыс берді, - деп хабарлайды Tengrinews.kz тілшісі 24.kg-ге сілтеме жасап.
Жогорку Кенештің бейінді комитеті алдымен Асанәлиевті бас прокурор қызметінен босату және оны МҰҚК басшысы лауазымына ауыстыру мәселесін қарады. Содан кейін мәселе парламент отырысына шығарылып, онда депутаттар да шешімді бірауыздан қолдады.
Енді Жогорку Кенештің шешімі Асанәлиевті МҰҚК басшысы етіп тағайындау туралы жарлыққа қол қою үшін Қырғызстан президентіне жолданады.
Мақсат Асанәлиев 2024 жылғы маусымнан бастап Қырғызстанның Бас прокуроры қызметін атқарды. 30 маусымда ол отставкаға кетті. Осыдан кейін президент Садыр Жапаров оны МҰҚК төрағасының міндетін атқарушы етіп тағайындады.
Еске салайық, бұған дейін Қырғызстанда күштік құрылымдар блогында кадрлық өзгерістер болған еді. Кейінірек МҰҚК-нің бұрынғы басшысы Қамшыбек Тәшиевке қатысты үкім шықты.
Тағы оқыңыз: Жапаров: Қамшыбек Тәшиевті Қырғызстан президенті еткім келді