Мүгедектігі бар спортшы федерация басшысын алаяқтық жасады деп айыптады: полиция шешім қабылдады
Tengri Sport тілшісі осы шиеленісті оқиғаның барлық мән-жайын анықтап көрді.
Жұмысқа тұрды ма, әлде құрыққа түсті ме?
Жетестің айтуынша, бұл жағдай бірнеше жылдан бері жалғасып келеді. 2023 жылы ол мүгедектігі бар адам ретінде паракаратэ федерациясына қосылып, жалақы алу туралы ұсыныс түскен.
Бірнеше айдан кейін оған өтініш жасалған, бірақ бұл өтініш кейіннен міндеттемеге айналып шыға келген.
- Бұл оның шәкірттері арқылы жүрді. Маған келіп, "тұрмысы төмен жандарға көмек көрсету керек, 50 мың теңгеден беріп тұрасың" деді. Басында бұған таңғалдым. Бірақ ол кісі біздің басқаларға да көмектесуіміз керек екенін, бұл қайырымдылық екенін айтты, - дейді Жетес тілшімізбен әңгімелесу барысында.
- Қайырымдылық әдетте ерікті түрде жасалады емес пе, ал сіздің жағдайыңызда, егер ақша бермесеңіз, жұмыстан шығаратыны туралы мәселе туындаған ба?
- 2024 жылы бұдан былай көрсетілген соманы бөле алмайтынымды айттым. Ол маған "онда жұмыстан шыға бер, өйткені өзгелерге де көмектесу керек" деп жауап берді. Маған келісуге тура келді, өйткені өз жәрдемақым ештеңеге жетпейді. Оның үстіне ипотека төлеймін.
Нәтижесінде, спортшының айтуынша, ол 23 ай бойы жұмыстан шығып қалудан қорқып, жалақысының үштен бір бөлігін белгісіз адамдарға беріп келген. Дәл осындай жағдайға осы федерацияға тіркелген тағы бір спортшы - Айжан Бекмұрат та тап болған.
"Өзім пәтер жалдап тұрамын, ақшадан тарығып отырмын. Әкем - екінші топтағы мүгедек, анам - зейнеткер. Бірақ ол маған "бермесең - жұмыстан кет" деді", - деп бөлісті Бекмұрат.
Instagram-дағы бұл жарияланымды көру
Антон Бованың жарияланымы (@spor_tjob)
Жетестің айтуынша, ол арыз жазғаннан кейін федерация басшысы кешірім сұрап, ақшасын қайтарған. Соған қарамастан, ол арызын қайтып алған жоқ және бұл істі соңына дейін жеткізгісі келеді.
"Мұндай адамдардың бұл қызметте отыруына, осындай қызметпен айналысуына және жалпы біз сияқты жандармен жұмыс істеуіне болмайды деп есептеймін", - деді ол тілшімізге берген сұхбатында.
Instagram-дағы бұл жарияланымды көру
Антон Бованың жарияланымы (@spor_tjob)
Полиция федерация басшысының әрекетінен қылмыс құрамын көріп отырған жоқ
Біздің Ішкі істер министрлігіне жолдаған сауалымызға сәйкес, бұл жағдай бойынша "Алаяқтық" бабымен сотқа дейінгі тергеу жүргізілгені, бірақ қылмыстық құқық бұзушылық белгілері анықталмағаны мәлім болды.
"Тергеу органы қажетті тергеу амалдарын жүргізді, алайда қылмыстық құқық бұзушылық құрамының бар екенін көрсететін жеткілікті дәлелдер табылған жоқ. Осыған байланысты қылмыстық іс қылмыс құрамының болмауына орай тоқтатылды.Бұл шешімнің заңдылығын қадағалаушы прокуратура тексеріп, істі тоқтату туралы қаулы бекітілді. Қылмыстық іс жүргізу кодексінің 291-бабына сәйкес, сотқа дейінгі тергеу тоқтатылғаннан кейін оны қайта бастау прокурордың немесе соттың істі тоқтату туралы қаулының күшін жоюы арқылы жүзеге асырылады", - делінген жауапта.
Біздің қолымызға Астана паракаратэ федерациясы басшысының ұстанымы жазылған істі тоқтату туралы қаулы түсті. Оның айтуынша, ол ақша аударуды сұрамаған және Жетес пен Айжан жалақысының бір бөлігін жіберіп отырған адамдарды танымайды деуге болады.
Ол параспортшылар екі әйелмен жарыстарда танысып, содан кейін өз еркімен қарыз беріп тұрғанын, ал ақшаның қайтарылмай жатқанынан хабарсыз болғанын алға тартады.
Мүгедектігі бар спортшылардан ақша алып отырған әйелдер де бұл сөздерді растаған.
Алайда, зардап шеккен спортшылардың айтуынша, федерация басшысының бұл екі әйелмен де тікелей байланысы бар.
"Тергеу барысында анықтағанымдай, олардың бірі - оның туған әпкесі, екіншісі - құрбысы. Олар ешқандай да тұрмысы төмен жандар емес (бізге солай айтқан болатын). Бұған беттестіру кезінде көзім жетті", - дейді Жетес.
Айта кететін жайт, полицияның істі тоқтату туралы қаулысында бұл ақпарат көрсетілмеген.
Сондай-ақ, онда федерация басшысының Жетеске жалақысының бір бөлігін қайда аудару керектігін үнемі ескертіп, қаражаттың түсуін бақылап отырғаны туралы да жазылмаған. Біздің иелігімізде нотариуспен расталған хат-хабарлардың скриншоттары бар.
Хат-хабар скриншоттары: Жетес Нұрмағамбетов ұсынған
Tengri Sport тілшісі паракаратэ федерациясының басшысымен байланысуға тырысты, бірақ ешқандай жауап ала алмады.
Айта кетейік, 2026 жылдың қаңтарынан бастап Жетес паракаратэ федерациясының тізімінде жоқ және бочча федерациясына тіркелген. Сонымен қатар, ол жерде жалақы алмайтындықтан, 110 мың теңге көлеміндегі мүгедектік бойынша жәрдемақысына күнелтуге мәжбүр.
Instagram-дағы бұл жарияланымды көру
Жетес Нұрмағанбетовтің (@jetes.nurmaganbetov) жарияланымы
Мүгедектігі бар қазақстандық спортшы басшылықты бопсалады деп айыптады