Тоқаев Мюнхенде Бавария премьер-министрімен кездесті
Мемлекет басшысы Қасым-Жомарт Тоқаев Баварияға шақырып, қонақжайлықпен қарсы алғаны үшін премьер-министр Маркус Зёдерге алғыс айтты.
"Баварияның өзіне тән ерекшелігін, экономикалық қуатын, инновациялық әлеуетін жоғары бағалаймын. Кеше Федералдық президент Франк-Вальтер Штайнмайермен және Федералдық канцлер Фридрих Мерцпен өте мазмұнды келіссөздер жүргіздім. Уағдаластықтарымызды нақты нәтижеге айналдыруға ниеттімін әрі аталған мәселеде Баварияны басты серіктес ретінде қарастырамын. Бұл – өнеркәсіп пен ғылымдағы өзінің озық жетістіктерін дәстүрге деген айрықша құрметімен ұштастырған өңір. Осы арқылы Бавария Германия экономикасын алға сүйреп, экономикамызды жаңғырту мен әртараптандыруда Қазақстанның сенімді серіктесі болып отыр", – деді Мемлекет басшысы.
Қасым-Жомарт Тоқаевтың айтуынша, Баварияның технологиялық табыстары мен Қазақстанның ресурстық және өнеркәсіптік әлеуетін біріктіруге айтарлықтай мүмкіндік бар.
Елдеріміздің экономикалық ықпалдастығын жандандырып, халықтарымызды бір-біріне жақындата түсуде көлік байланыстарын жақсартудың да маңызы зор.
Фото: Ақорда баспасөз қызметі
"Премьер-министр Маркус Зёдер жаңа өсім бағыттарын іздеуге айрықша мән беретін Бавария Қазақстанмен сан қырлы ынтымақтастықты нығайтуға мүдделі екенін жеткізді. Сондай-ақ ол елімізде табысты жұмыс істеп жатқан бавариялық компанияларға көрсеткен қолдауы үшін Қазақстан Президентіне ризашылығын білдірді", - деп атап өтті Ақорда баспасөз қызметі.
Фото: Ақорда баспасөз қызметі
Кездесу соңында Мемлекет басшысы Бавария премьер-министрімен қонақжай қазақ жерінде жүздесуді асыға күтетінін айтты.
Фото: Ақорда баспасөз қызметі
Маркус Зёдер Қасым-Жомарт Тоқаевқа мюнхендік "Бавария" ойыншыларының қолы қойылған жейдені сыйға тартты.
Посмотреть эту публикацию в Instagram
Публикация от Aqorda (@akordapress)
Еске сала кетейік, 30 қыркүйекте Қасым-Жомарт Тоқаевтың Германияға ресми сапары Мюнхенде жалғасты.
29 қыркүйекте Германия Федеративтік Республикасының Қорғаныс министрлігінде Қазақстан Президенті Қасым-Жомарт Тоқаевты қарсы алу рәсімі өтті. Кеше Қазақстан мен ГФР президенттері шағын құрамда келіссөз жүргізді. Мемлекет басшысы Германияға сапармен келуге шақырып, қонақжайлық көрсеткені үшін Франк-Вальтер Штайнмайерге алғыс айтты.
Бұдан кейін Тоқаев пен Штайнмайер Қазақстан-Германия бизнес форумына қатысты.
Сондай-ақ Қасым-Жомарт Тоқаев Берлинге сапары аясында канцлер Фридрих Мерцпен келіссөз жүргізді.
Бағыт анықталды. Тоқаевтың Берлиндегі екі күні қалай өтті?
Сілтемесіз жаңалық оқисыз ба? Онда Telegram желісінде парақшамызға тіркеліңіз!