“Ұйқыда өртеніп кеткіміз келмейді“: Алматыда тұрғын үй кешенінің тұрғындары жарықтандыруға шағымданды
"Бір жылда үш өрт": не болды?
Әлеуметтік желілерде "Кәусар" ТҮК тұрғынының жазбасы пайда болды. Оның сөзінше, үйлердің қасбетіндегі жарықтандыру 2025 жылы Сайранды реконструкциялаудан кейін орнатылған.
Автор кейінгі бір жыл ішінде құрылғының үш рет өртенгенін алға тартады.
"Мен e-Otinish-ке жаздым, жауап былай болды: тексереміз және жөндейміз. Бүгін түнде тағы да өрт шықты! Әкімдік бізді естуі үшін осы жазбаны қолдаңыздаршы. Біз әкімдік орнатқан қытайлық шамдардың кесірінен ұйқыда жатқанда өртеніп кеткіміз келмейді", – деп жазды тұрғын.
Сондай-ақ ол жарықтандырудың тұрақсыз жұмысына да шағымданды. Оның айтуынша, жабдық үйлердің Сайран жағалауы жағынан көрінетін бөлігіне орнатылған, бірақ жыл бойы жүйе дұрыс істемей келеді.
"Бірде бір үй, бірде екі үй жанады, кейде бәрі жанады, ал кейде мүлдем жанбайды (ТҮК-де бес үй бар). Оның үстіне үш рет өрт шықты! Өтінемін, оны демонтаждаңыздар!" – деп жазды әйел.
Threads-тен көру
Әкімдік жарықты өшіріп, сотқа арыз дайындап жатыр
Әкімдік барлық ақау жойылғанша қасбеттегі жарықтандыруды толығымен өшіретінін хабарлады.
"Кәусар" ТҮК / Фото Tengrinews.kz
Алмалы ауданы әкімінің аппараты бұған дейін монтаждау кезіндегі бұзушылықтарға байланысты мердігерден жұмысты қабылдаудан бас тартқаны белгілі болды. Осыдан кейін тараптар соттасып, сот тапсырыс берушінің жағына шыққан. Енді билік тағы бір талап арыз дайындап жатыр.
"Қазір компанияны жұмысты толығымен қайта жасауға және жүйенің өрт қауіпсіздігін қамтамасыз етуге міндеттеу үшін сотқа талап арыз дайындалып жатыр", – деп хабарлады әкімдіктегілер.
"Кәусар" ТҮК жарықтандыруы / Фото Tengrinews.kz
ТЖД-ға шақырту түспеген
Алматы ТЖД Tengrinews.kz-ке бұл жағдай бойынша 101 немесе 112 нөмірлеріне ешқандай шақырту түспегенін мәлімдеді.
Ведомство тұрғындарды кез келген өрт туралы шұғыл қызметтерге хабарлауға шақырды.
"Кәусар" ТҮК / Фото Tengrinews.kz
Алматыда жарықтандыру қалай өзгерді?
Көшелерді жарықтандыру мәселесі ұзақ жылдар бойы қала үшін ең өзекті түйткілдердің бірі болып келді. Қараңғылықтан құтылу әрекеттерін барлық қала басшысы жасағанымен, алматылықтар жарықтың нашарлығына шағымдануын тоқтатпады.
2025 жылы қалада жарықтандыруды жаңарту бойынша ауқымды жұмыс жүргізілді. Тамыз айында әкім Дархан Сатыбалды жарықтандырудың мастер-жоспарын таныстырып, жыл соңына дейін қаланы жарықпен қамту деңгейін 100 пайызға жеткізуге уәде берді.
"Кәусар" ТҮК / 2025 жылғы қараша / Фото Tengrinews.kz
Сол кезде қала тек көше шамдарын ғана емес, ғимараттардың архитектуралық жарықтандыруын да жаңартқан болатын. Қараша айына қарай мұндай жарық Алматыдағы 70-тен астам нысанға орнатылды.