Франциядағы оқушылар наразылығы: полициямен қақтығыс кезінде жасөспірім қолынан айырылды

Францияның солтүстігіндегі Ланс қаласында дүйсенбі күні мектеп оқушылары мен студенттердің наразылығы кезінде полиция лақтырған гранатаны қолына алған 15 жастағы жасөспірім жараланды. Францияда үшінші апта қатарынан жалғасып жатқан наразылық шаралары кей кездері зорлық-зомбылыққа ұласып жатыр, деп хабарлайды Tengrinews.kz тілшісі Le Monde басылымына сілтеме жасап.
Франция бойынша бірнеше күнге созылған студенттік шерулер кезінде Ланс қаласында 15 жастағы жасөспірім полицияның арнайы бөлімшесі лақтырған гранатаны көтеріп алып, қолынан айырылған. Полиция кәсіподағындағы дереккөздің мәліметінше, оқ-дәрі оның қолында жарылған.


Оқу жағдайын жақсартуды талап еткен жаппай акциялар жүздеген лицейдегі сабақтың тоқтауына себеп болды, кей жерлерде бұл баррикадалар мен өрт қоюға ұласқан.
Францияның адам құқықтары лигасы (LDH) наразылық білдірушілер арасында кәмелетке толмағандардың көп екенін айтып, қауіпсіздік күштерін пропорционалды емес әдістер қолданды деп айыптады.

"Полицияға берілген нұсқаулықтарда балалармен жұмыс істеп жатқанына қарамастан, ұстамдылық таныту туралы бұйрық жоқ екенін көріп отырмыз", - деді LDH президенті Натали Техио.


Франциядағы оқу жағдайын жақсартуды талап еткен 2 апталық наразылықтың нәтижесі: - бірнеше жоғары сынып оқушысы көзінен, тісінен, ал бүгін қолы мен білегінен айырылды - 5 мыңнан астам студент тұтқындалды - полиция күштері жиналыс өткізіп жатқан студенттерді бөгеу үшін университетке басып кірді және т.б. https://t.co/fKnCuctB8j
— lulu11842 ???? SEEING SABRINA TODAY! ???? (@lulu11842) 5 қазан, 2026

Үкімет өз кезегінде асыра сілтеуші солшыл белсенділер наразылық қозғалысын өз пайдасына асыруға тырысып жатыр деп мәлімдеді. Дүйсенбіде оқушылардың бір бөлігі сабаққа оралды, алайда сейсенбіде бұдан да ауқымды шерулер болады деп күтіледі.
Білім министрлігінің мәліметінше, дүйсенбі күні таңертең 3700 лицейдің 400-ге жуығы ішінара немесе толықтай жабылды. Наразылық басталғалы бері 24 мектеп өртеніп немесе тоналды. 5000-нан астам адам ұсталды, олардың 85 пайызы - кәмелетке толмағандар. Полицияның қатыгездігі болуы мүмкін деген жағдайлар бойынша кемінде үш ішкі тергеу жүріп жатыр.
Қозғалыс 17 қыркүйекте Париж маңындағы Кретей қаласында кадр тапшылығы мен ресурстардың аздығына байланысты ереуілге шыққан мұғалімдерді қолдау мақсатында басталған. Наразылық шаралары бүкіл елге тез тарап, кей жерлерде вандализмге - автобус аялдамаларын қиратуға, мектеп кіреберістерін өртеуге және қауіпсіздік күштерімен қақтығыстарға ұласты. Саяси ахуал президент Эммануэль Макронның мұрагері анықталатын 2027 жылғы сайлау қарсаңында шиеленісе түсті.