Гармун алыйк әле кулга
Бу кичәдә авылның иң кечкенә баянчысы Ислам Гәрәев, аның әбисе Лалә Сафиуллина, Рәкыя апа Таҗиева, Илгиз Әхмәтҗанов, Имәнлебаш тумасы Әнәс абый, Югары Чаллы авылыннан Гомәр абый Сәгыйдуллин, Разат Даутов, Мирзәхмәт абый Вәлиуллин һ.б. баянчылар, гармунчылар катнашты. Мирзәхмәт абый Вәлиуллин өздереп тальянда уйнап, үзе җырлап тамашачыны таң калдырды. Рәкыя апа Таҗиева да яшьлегендәге җырларын башкарды. Лалә апа Сафиуллина бик борынгы халык көйләрен сыздырды. Гомәр абый бәйрәмгә ата-бабадан тапшырылган тальяны белән килгән иде. Әлеге кадерле мирасны аның бабасы бер телем ипигә сатып алган булган. Кыңгыраулы гармуннан агылган борынгы көйләрдән залдагы тамашачылар елап утырды. Соңыннан Гомәр абый тальянында чордашлары, авылдашларын залда җырлатты, биетте.
-Бу кичәдән бик хисләндек, тәэсирләндек. Гомәр уйнаган көйдән яшь чактагы кичке уеннар искә төште, әйтерсең, без киредән яшьлеккә кайттык, күңел һич картаймый икән ул. Бу очрашудан яшәүгә көч-дәрман алдык, кичәне оештыручыларга бик зур рәхмәт, - ди Нурлыбанат апа Имамиева.
Марс Гуриев күбрәк әниләргә багышланган җырларны баянда уйнап, үзе башкарды. Ислам Гәрәев тә әбисеннән калышмады: тамашачыларга әтиләр турында җырлар бүләк итте. Сеңлесе Исламия, абыйсы уйнаганга кушылып, туган як турында җырлар башкарды.
Бу көнне тамашачыларга сәхнәләштерелгән тамашалар да күрсәтелде. Алабуга культура-агарту көллиятендә укучы студентлар, кунак егетләр Рафил Иркашев, Илнар Кашапов, Илдар тормышта булган кызыклы хәлләрне сәхнәләштереп күрсәтте. Фирүзә Вәлиуллина белән Алсу Яруллина төрле милләт халкы биюләрен авылдашларга бүләк итте.
- Төрле буын вәкилләренең үз чоры җыр-моңнары белән чыгыш ясавы күңелгә рәхәтлек бирде. Мондый очрашу-бәйрәмне җәен табигать кочагында оештырасы иде, - ди Мәрьям апа Вәлиуллина.
Авылдашларның теләген канәгатьләндерергә тырышырбыз.