“Елгаларга – чиста ярлар!”
Әлеге исем астында уздырылган экологик акцияне табигать сакчылары оештырды.
Су объектларын саклау һәм экология икеайлыгы уңаеннан Татарстан республикасы экология һәм табигать ресурслары министрлыгы көньяк-көнчыгыш идарәсе белгечләре Әлмәтнең экология һәм табигатьтән файдалану департаменты хезмәт коллективы белән берлектә елга буйлары чисталыгын саклауга нигезләнгән акция оештырды. Анда 40 артык кеше катнашты, шул исәптән политехник техникум студентлары һәм “БудетЧисто” яшьләр экологик хәрәкәте волонтерлары да. Алар бергәләп шәһәр сусаклагычы территориясен чистартты.
Яшьләргә ярдәмгә ике берәмлек техника беркетелгән булган, нәтиҗәдә биредән көн дәвамында 12 кубометр чүп түккәннәр. Экологлар фикеренчә, әлеге чара ике ай дәвамында тагын берничә тапкыр оештырылырга тиеш.