Район үзәгенең Кама буенда бөек шагыйрь Габдулла Тукайның тууына 130 ел тулуга багышлап шигърият бәйрәме узды

Сәхнәдә бәйрәм тантанасы хөкем сөрде. Чыгыш ясаучылар берсен- берсе алыштырып кына тордылар.Төп сәхнәдән бераз читтәрәк китапханәчеләр оештырган чара барды. Балалар иҗат үзәге хезмәткәрләре кечкенә мәйданчык ясап балаларга чыгыш ясарга мөмкинлек тудырды. Ә яр буенда бер төркем бала асфальтка рәсем төшерде.

Бәйрәмгә район үзәгеннән, авыллардан олысы-кечесе килгән иде. Берничәсе белән әңгәмә кордык. “Бирегә без кызым белән килдек. Бәйрәм күңелле бара. Мәктәптә дә Тукайга багышлап шигырь бәйрәмнәре үткәргән идек. Балалар бик теләп үзләре дә шигырьләр иҗат иттеләр”,-ди Балык Бистәсе гимназиясенең татар теле һәм әдәбияты укытучысы Гөлнара Яруллина. Яңа Арыш авылыннан Рәзилә Мөхәммәтрәхимовалар гаиләләре белән бергә килгәннәр. Игътибар белән тамашаны күзәттеләр. “Тукай иҗаты безгә бик ошый. Балалар бакчасыннан ук аның иҗатын өйрәнеп үстек. Тукай сүзе үк күңелгә якын. Шигьрияткә якын булу беркемгә дә зыянга булмас.Шигьри җанлы күңел тутыкмый ул”,-ди Рәзилә. Шул ук авылдан 67 яшьлек Үзбәк Мусин дә бәйрәмне карарага дип килгән. Сәхнәдәге һәр чыгышны бирелеп тыңлады. “Басудан туры монда килдем. Тукайны бик хөрмәт итәм мин. Тукай әдәбиятыбызга, мәдәниятыбызга, сәнгатькә юл сызып калдырган кеше. Мин үзем өлкән яшькә җиткәч кенә шигырьләргә игътибар итә башладым. Шагыйрьләр дүртъюллыкта гына да кешенең гомерен чагылдырып бирә алалар. Аларга сокланмый мөмкин түгел. Ничәмә-ничә районда булдым, кешеләр белән белән аралаштым. Нәтиҗәдә безнең Балык Бистәсе халкы чын татарча, Тукайча сөйләшә икән дип сокландым әле. Бер елны Казанга кирпечкә баргач, иптәш малай белән сөйләшеп торганда Арча районыннан булган бер ир-ат безнең янга килде дә, “егетләр сез шундый матур итеп татарча сөйләшәсез, кайсы районнан”, дип сорады. Тукай эзләреннән йөрүчеләр безнең телгә сокланалар, бик зур рәхмәт сезгә, дип җавап бирдем аларга”,-дип сөйләде Үзбәк абый.

Гөлназ Зарипова. 

Фото:tatarile.org