Әлмәттә һәр шимбә – бушлай концерт
«Шәһәрдә мәдәни мохит» проекты дәвам итә.
Узган шимбә көнне мәдәни-күңел ачу чарасы калабызның җиде мәйданчыгында үтте. «Нефтьче» Мәдәният сарае һәм музыка көллияте артистлары, балалар концерты, төрле бию һәм вокаль ансамбльләр, Казаннан килгән «Монте-карло» кавер-төркеме һәм башкаларның чыгышлары зур бүләк булды. Балалар өчен сәйләннән әйберләр үрү, модульле оригамилар ясау буенча мастар-класслар да әзерләнгән иде. Гагарин урамында шахмат буенча узган ярышлар шулай ук тамашачыларны байтак җыйды. Әлмәтлеләрне киләсе шимбә дә күңелле чаралар көтә.