АЙГА КЫРЫН КАРАМА

18 октябрь (шимбә). Зөлхиҗҗә аеның 24 нче көне. 24 нче Ай тәүлеге. Ай Арыслан йолдызлыгында, 1.04 сәгатьтә калка, 15.32 сәгатьтә бата. 4 нче фаза.  Көн озынлыгы 10.17 сәгать.

Бу тәүлектә яңаны тудыра торган табигать көчләре уяна. Энергетикасы гаять куәтле. Гаиләдә мәхәббәт һәм наз тантана итә. Хәлсез кешегә күбрәк ял итәргә кирәк.  Эчәклек, бавыр, тире зәгыйфь. Көнцертка, театрга, кинога бару өчен уңай вакыт. Көзге табигать белән хозурлану да күңелне тынычландыра.

Гастриттан - кесәл

1 аш кашыгы җитен орлыгын 1 стакан кайнар суга салып, су мунчасында сыек кесәлгә әйләнгәнче пешерәләр дә, ашарга 10 минут кала яртышар стакан эчәләр. Яисә 1 чәй кашыгы бәрәңге крахмалын 1 стакан кайнаган җылы суга салып болгаталар да,  ашаганчы өчтән берешәр стакан эчәләр. 

19 октябрь (якшәмбе). Зөлхиҗҗә аеның 25 нче көне. 25 нче Ай тәүлеге. Ай Кыз йолдызлыгында, 2.09 сәгатьтә калка, 15.53 сәгатьтә бата. 4 нче фаза.  Көн озынлыгы 10.12 сәгать.

Акыл җыю көне. Бер эшне дә ашыгып эшләргә ярамый.  Организмны чистарту, мунчада чабыну уңай нәтиҗә бирә. Күп сыеклык эчәргә ярамый. Энергияне юк-барга сарыф итмәү хәерле. Ач тору файдалы.

Ашказанына дәва

Ашказаны җәрәхәтеннән интеккәннәр мондый тәмле дару белән дәвалана ала. Иттаркычтан төшләре алынган, кабыгы чистартылмаган 1 лимон, 500әр грамм күрәгә, йөзем һәм әстерхан чикләвеге төшен чыгарып, 500 грамм бал кушып болгаталар да,  көненә 3 тапкыр, ашар алдыннан, 1әр аш кашыгы кабалар. Суыткычта саклыйлар.

20 октябрь (дүшәмбе). Зөлхиҗҗә аеның 26 нчы көне. 26 нчы Ай тәүлеге. Ай Кыз йолдызлыгында, 3.15 сәгатьтә калка, 16.12 сәгатьтә бата. 4 нче фаза.  Көн озынлыгы 10.08 сәгать.

Авыр энергетикалы көн, кеше организмына начар йогынты ясый, мәшәкать һәм ыгы-зыгыга батыра. Мәгънәсез активлыктан тыелу, гайбәт сөйләмәү, күп энергия сарыф итмәү сорала. Мунча керү, массаж ясату файдалы. Аяклар зәгыйфь. Стоматологка бармый тору хәерле. Балык, мүк җиләге белән сыйлану файдалы.

Иммунитетны  дәфнә ныгыта

12-15 дәфнә яфрагын 1,5 стакан кайнар суга салып, 5 минут пешерәләр дә, термоска салып, 4 сәгать төнәтәләр, сөзәләр. Көненә 3 тапкыр 1әр аш кашыгы эчәләр, тамакны чайкыйлар, борынны юдыралар. Дәва курсы - 1 ай. Суыткычта саклыйлар.

21 октябрь (сишәмбе). Зөлхиҗҗә аеның 27 нче көне. 27 нче Ай тәүлеге. Ай Үлчәү йолдызлыгында, 4.22 сәгатьтә калка, 16.32 сәгатьтә бата. 4 нче фаза.  Көн озынлыгы 10.04 сәгать.

Ут белән сак булу сорала. Туганнар белән аралашу, балаларга игътибарлырак булу хуплана. Кан һәм лимфа авырулары кискенләшергә мөмкин, кан бирергә ярамый. Сизү әгъзалары, баш зәгыйфь, кан басымын контрольдә тоту мөһим.

Канны чистарту

Дөрес тукланмау, алкогольне күп куллану, тәмәке тарту канны «пычрата», нәтиҗәдә төрле тире авырулары (чуан, бетчә чыгу, чәч кавыклану һәм коелу), шулай ук невроз килеп чыгарга мөмкин. Түбәндәге чаралар булыша ала. Ярты литр сөтне кайнатып, 5 шакмак шикәр салалар, эчәрлек булып суынгач, ярты лимон согы өстиләр дә, әчегәч, ач карынга эчәләр. Яисә тигез микъдарда тузганак яфрагы, яшь кычыткан яфрагы, күгән (терн) чәчәге алып, 2 аш кашыгы катнашманы 2 стакан суга салалар һәм газ мичендә 2-3 сәгать төнәтәләр. Барлыкка килгән төнәтмәне 2 көндә эчеп бетерәләр. Дәва курсы - 2 атна. Ике очракта да балык, ит, йомырка ашамыйча, сөт ризыкларын гына куллану сорала.

22 октябрь (чәршәмбе). Зөлхиҗҗә аеның 28 нче көне. 28 нче Ай тәүлеге. Ай Үлчәү йолдызлыгында, 5.31 сәгатьтә калка, 16.53 сәгатьтә бата. 4 нче фаза.  Көн озынлыгы 9.59 сәгать.

Игелекле эшләр башлау көне. Кәеф күтәренкелеген сакларга, планнар корырга, файдасыз элемтәләрне һич икеләнмичә өзәргә кирәк. Төрле һөнәрләр өйрәнү, кибетләрдә йөрү өчен уңай вакыт. Ит һәм ярма ашамау хәерлерәк. Ач тору файдалы. Күзләрне арытмау зарур.

Тавык шулпасы

Көнбатыш Аурупа илләрендә тавык шулпасын «яһүд пенициллины» дип атыйлар, чөнки ул йогышлы салкын тидерүләрдән саклану чарасы булып тора. Яңгырда юешләнгәндә яки, автобус көтеп, бик каты туңганда, кечерәк кенә бер тавыкны аз гына суда пешерәләр дә, төелгән кара борыч һәм 1 баш суган турап салып, сүндерәләр. Шулпа өстендәге майны җыеп алалар, чөнки диетологлар, ризыкта май никадәр азрак булса, ул иммунитетны шулкадәр яхшырак ныгыта, дип саный. Шулпаны тәлинкәгә салгач, күп итеп яшел тәмләткеч үләннәр сибәләр, 1-2 телем лимон сыгалар.
 
23 октябрь (пәнҗешәмбе). Зөлхиҗҗә аеның 29 нчы көне. 29 нчы Ай тәүлеге. Ай Үлчәү йолдызлыгында, 6.40 сәгатьтә калка, 17.15 сәгатьтә бата. 4 нче фаза.  Көн озынлыгы 9.54 сәгать.

Авыр энергетикалы көн. Бернинди яңа эш башламаска, мөһим мәсьәләләрне хәл итмәскә кирәк. Организмга булышу өчен ашауны чикләргә, физик эш күләмен киметергә киңәш ителә. Бил, бөерләр, эчәклек зәгыйфь. Салкын тию ихтималы бар, шунлыктан җылы киенү зарур. Салкын тиюне кисәтү өчен, укроп, петрушка, кара борыч, әнеч кебек тәмләткечләрне күбрәк куллану файдалы.

Чәчне ныгыту

Чәчне ныгыту һәм үстерү өчен, 1 литр җылы суда 2 аш кашыгы бал эретеп, чәчне чайкарга кирәк. Чәч коелганда, тигез микъдарда кушылган кастор мае һәм медицина спиртын атнасына 3-4 тапкыр баш тиресенә сөртергә киңәш ителә, 2-3 сәгатьтән соң башны шампунь белән юып, ярты лимон согы кушылган су белән чайкыйлар. Чәчне чайкый торган суга яңа сыгылган кычыткан согы кушу кавыкны бетерә, кан әйләнешен яхшырта, чәч тамырларын ныгыта.
 
24 октябрь (җомга). Зөлхиҗҗә аеның 30 нчы көне. 1 нче, 2 нче Ай тәүлекләре. Ай Чаян йолдызлыгында, 7.51 сәгатьтә калка, 17.41 сәгатьтә бата. 2 сәгать 56 минуттан яңа Ай. Көн озынлыгы 9.50 сәгать.

1 нче көн - иҗади фикерләү, планнар төзү көне. 2 нче көнне кеше организмы стресс халәте кичерә, эчке стрессны авыр физик эш, күп ашау белән көчәйтмәү хәерле. Бу тәүлек кешене саранлыкка, әйбергә табынуга этәрә, шунлыктан киресенчә эшләргә - юмартлык күрсәтергә кирәк. Сизү әгъзалары, баш, тешләргә игътибарлырак булу сорала.

Катлы күптермә

Бәрәңгене юка телемнәргә, суганны - боҗралап турыйлар, сырны уалар. Табага 1 кат бәрәңге тезәләр, өстенә суган боҗраларын, аннары сыр җәяләр. Шулай итеп берничә тапкыр кабатлыйлар, иң өстә сыр булырга тиеш. Сөт өсте салып, 180 градуслы газ мичендә бәрәңге әзер булганчы пешерәләр.