«Мне страшна, але ў Беларусі яшчэ горш». У Беластоку ўпершыню прайшоў гей-парад і сустрэў супраціў тысяч.

Самы блізкі да беларускай мяжы парад роўнасьці прайшоў 20 ліпеня ў польскім Беластоку. Удзел у ім узялі каля 800 прадстаўнікоў ЛГБТ-супольнасьці і іх бацькоў, а таксама актывістаў, якія выступаюць за аднолькавыя правы для людзей незалежна ад іх сэксуальных перавагаў.

Гей-парад быў неадназначна ўспрыняты жыхарамі Беластоку - некалькі тысяч чалавек паўдзельнічалі ў акцыі супраціву, яны выкрыквалі гамафобныя лёзунгі, кідалі ва ўдзельнікаў пэтарды і бутэлькі. 

Як распавялі Свабодзе арганізатары параду, яны чакалі, што сустрэнуць нэгатыў і супраціў — з боку каталіцкай супольнасьці Беластоку, але найперш з боку футбольных фанатаў.