Пінск супраць гвалту і фальсіфікацый
У Пінску, як і па ўсёй краіне, на працягу тыдня ладзяцца масавыя акцыі пратэсту супраць фальсіфікацыі выбараў і супраць ужывання гвалту сілавікамі.
У Пінску ад серады ўсе акцыі адбываюцца на адной з цэнтральных гарадскіх вуліц – Першамайскай, а сёння, 16 жніўня, каля 20 тысяч пінчукоў сабраліся на галоўнай плошчы і маршам прайшліся па горадзе.
Пінчукі распавялі нашаму радыё, што іх падштурхнула да ўдзелу ў пратэстах:
– Відавочная несправядлівасць, відавочная фальсіфікацыя. Гэта ўсё пастаноўка, усё няпраўда. І гэта вельмі смешна выглядае, шчыра кажучы, як адзін цырк.
– Я ніколі не бачыла сумленных выбараў, і мая прэтэнзія ў тым, і патрабаванне ў тым ліку ў тым, каб нарэшце ўбачыць гэтыя сумленныя выбары.
– Неабходна далей мяняць сістэму, без змены сістэмы гэта толькі пытанне замены асобаў.
– Калі ва ўладзе сядзіць нягоднік, то ў краіне дрэнна. Людзі гінуць. А калі там сядзіць нармальны чалавек, то і краіне добра.
Пінчукі выказваюцца за правядзенне ў краіне новых выбараў, вызвалення ўсіх арыштаваных пратэстоўцаў і прыцягнення да адказнасці тых, хто катаваў затрыманых грамадзян.
Беларускае Радыё Рацыя