Канцлер Шольц: Пуцін казаў, што Беларусь і Украіна не павінны быць самастойнымі дзяржавамі

Канцлер Нямеччыны Олаф Шольц расказаў аб перамовах з Уладзімірам Пуціным перад пачаткам вайны, падчас якіх той заявіў, што Беларусь і Украіна не павінны быць самастойнымі дзяржавамі. Нямецкі палітык агучыў гэта на дне адчыненых дзьвярэй у канцылярыі, піша Die Welt.


Ён абвінаваціў Пуціна ў тым, што той пачаў напад на Ўкраіну па «цалкам абсурдных» прычынах.


«NATO ніколі не было пагрозай для Расеі», — сказаў канцлер, абвяргаючы абвінавачаньні ў тым, што краіны NATO не клапаціліся аб інтарэсах бясьпекі Расеі да вайны.


Перад вайной ён запэўніў Пуціна, што сяброўства Украіны ў NATO «не стаіць на парадку дня на бліжэйшыя 30 гадоў».


«У Пуціна ёсьць „цалкам абсурдныя“ ідэі, і ён казаў яму, што, напрыклад, Беларусь і Ўкраіна насамрэч не павінны быць самастойнымі дзяржавамі», — гаворыцца ў матэрыяле.