Кавалеўскі: Прэмія Алесю Бяляцкаму нагадае свету пра Беларусь
Сёння стала вядома, што Алесь Бяляцкі – кіраўнік ПЦ “Вясна” – атрымаў Нобелеўскую прэмію міру, знаходзячыся за кратамі па палітычна матываваным абвінавачанні. Разам з ім за кратамі знаходзяцца яшчэ 5 прадстаўнікоў “Вясны”. Разам з Алесем Бяляцкім з Праваабарончага цэнтра “Вясна”, лаўрэатамі Нобелеўскай прэміі міру сталі ўкраінскі „Цэнтр Грамадзянскіх Свабод” і расейская праваабарончая арганізацыя „Мемарыял”.
Важнасць гэтай падзеі абмеркавалі з Валерыем Кавалеўскім – прадстаўніком Аб’яднанага пераходнага кабінету Беларусі, адказным за міжнародныя справы.
РР: Ці можам мы меркаваць, што гэтае рашэнне можа дапамагчы ў палітычным сэнсе ў вызваленні палітвязняў? Сёння ўжо ў сацсетках пішуць, што ахоўнікі ў СІЗА №1 будуць разумець, што яны ахоўваюць Нобелеўскага лаўрэата.
Валер Кавалеўскі: Канешне, хацелася б верыць у тое, што гэта, магчыма, прывядзе да нейкіх рашэнняў рэжыму, і можа будуць нейкія паслабленні, можа кагосьці вызваляць. На жаль, мы можам толькі спадзявацца. Бо ўсімі сваімі дзеяннямі рэжым паказвае, наколькі ён адарваны не толькі ад рэалій, але ў краіне пануе беззаконне. Спадзяванні ёсць, але гэта пакуль толькі спадзяванні.
Калі казаць пра міжнародны парадак дня, то мы ўпэўненыя ў тым, што гэта нагадае многім пра тое, што крызіс у Беларусі не вырашаны, што трэба яшчэ больш надаваць гэтаму ўвагі, трэба яшчэ больш практычных крокаў для таго, каб дамагчыся вызвалення палітычных вязняў, каб спыніліся рэпрэсіі, каб былі праведзены выбары, якія стануць сапраўдным вырашэннем унутрыпалітычнага крызісу. І Алесь Бяляцкі настолькі вядомая і настолькі несупярэчлівая фігура, непалітызаваная фігура, што гэтае рашэнне павінна нам усім вельмі дапамагчы.
Цалкам гутарка ў далучаным гукавым файле:
Беларускае Радыё Рацыя
Artykuł Кавалеўскі: Прэмія Алесю Бяляцкаму нагадае свету пра Беларусь pochodzi z serwisu БЕЛАРУСКАЕ РАДЫЁ РАЦЫЯ.