Британин министро зезагаш дехкина Немцов вийначу тIай тIехь

Оьрсийчоьнан политик, оппозиционер Немцов Борис вийначу меттиге зезагаш дехкина Великобританин арахьарчу гIуллакхийн министро Джонсон Бориса. Москворецкан тIай тIехь  хIоттийначу халкъан мемориална уллехь шен даьккхина сурт твиттере хIоттийна министро, "Бакъонан кхел хила езаш ю" аьлла, буха а яздина.


Оьрсийчоьнан арахьарчу гIуллакхийн министрца Лавров Сергейца цхьанакхета Москох веанера Джонсон Борис. Къевлинчу неIаршкахь дIадаьхьна цу шиммо дийцарш.


Оьрсийчоьнца юкъаметтигаш таян Iалашо ю шен аьлла, дIахьедина Британин министро, къаьсттина шайн пачхьалкхехь арахоьцучун экспорт алсам а йоккхуш.


Иштта Джонсона билгалдаьккхина, Украинехь лаьттачу ситуацин хьокъехь  Москохан а, Лондонан а хьежамаш цкъачунна кеп-кепара хилар а.


ГIирмех Великобританин позици хийцаялаза ю – Украинан суверенитет Оьрсийчоьно йохийна аьлла хета Лондонна.


Цхьана агIор и проблема а ясталур ю аьлла тешам къадийна Британин министро.