Шен майрчун кIентан берашна тIехь гIело ярна десте шеконашка лаьцна Нохчийчохь
53 шо долу Нохчийчуьра яхархо бехкейо шен майрчун кIентан берашна тIехь Iазап латторна: цуьнан кегийрачу кIантана а, йоьIана а етташ, царна кхераме долу молханаш моьлуьйтуш хилла цо.
Талламна хетарехь, дайначу шарахь бехкеечо "шен майрчун кIантехьа болчу цабезамна, кест-кеста дегIан а, синан а бала хьоьгуьйтуш хилла цо" цуьнан диъ а, кхоъ а шераш долчу шина бере: царна етташ, кхерамаш туьйсуш, сийсазбеш, ялх шо кхачанза долчу берашна магийна доцу мера чу туху молханаш моьлуьйтуш хьийзина иза.
Берийн могушалла талхаран бахьана гучудаккха аьтто баьлла, церан нанас камера а латийна, дIахIоттийначу телефоно цигахь хуьлург дIаяздарна, дуьйцу Нохчийчухула йолчу СКР-о. Бехкеечун хьокъехь гIаттийна бехктакхаман гIуллакх кхеле хьажийна кхин дIа листа.
Хьалхо Соьлжа-ГIалара яхархо бехкейора шен майрчун хьалхара зудчух диссина берашна къизачу кепехь еттарна. 10 шо долу йоIанна а, цуьнан 8 шо долчу вешина йина хиллера и гIело.
2019-чу шеран Товбецан-баттахь ГIалгIайчуьра ворхI шо долу Ажигова Iайша дарбан цIийне ялийра, дегIа тIе цIе Iиттина а, межеш лазийна а ларш, шира чевнаш, гангрена а йолуш. Цуьнан аьтту куьйг дIадаккха дийзира. Цуьнан ден йишас Ганиева Маккас йина цунна и чевнаш. ЙоьIан ден йиша, цуьнан цIийнда, МВД-н экс-белхахо Марзиев Iийса бехке лаьрра берана тIехь гIело ярехула долчу гIуллакхехь. Ганиевана юккъерчу рожан колонехь даккха 6 шо туьйхира, Марзиевна – шиъ, ах шо туьйхира шогачу рожехь даккха.
Къилбаседа ХIирийчохь бехктакхаман гIуллакх диллира республикан Моздокан кIоштан вахархочунна, жима берана тIехь гIело ярна шеконашка а лаьцна.
ГIалгIайчоьнан прокуратурано таллам болийра, гIаръяьккхинчу видео тIехула – цу тIехь гуш ю, Троицкан хьекъална эшначу берийн цIийнехь-интернатехь кхиош волчу кIентан са дукъош йолу йоI.