Велла дIаваллалц хан токхучу нохчийн тIемалочун кехаташ кхехьийта бакъо къовса аьтто ца баьлла ФСИН-н
Кхел йинарш белла дIабовллалц чохь буьтучу Хабаровскан кIоштарчу номер 6 йолчу колонина дуьхьало йина Нохчийчоьнан Лакхарчу кхело, тутмакхна Ражаев Мансурна кехаташ кхехьийтар цара цамагорна. Бакъо йоцуш герзашца болчу нахах вовшахтоьхначу тобанехь дакъалацарна хан йоккхуш ву иза.
Соьлжа-ГIаларчу Заводской кIоштан кхело 2021-чу шеран стигалкъекъа-баттахь ах тIеийцира Ражаевн искан тIедахкарш, циггахь таIзар токкхучу тутмакхе кехаташ яздар доьхкуш колонин администрацин сацам низамехь бац аьлла. Кхело тIедожийра урхаллин куьйгаллина Ражаевна "Оьрсийчоьнан Почтехула" кехаташ кхехьийтар магаде аьлла. Апелляцино и сацам ницкъехь битира, амма ИК-6 администраци гIоьртира юха а цуьнца къовса, кхин а керла хIуманаш цигахь гучудевлла аьлла.
Оьрсийчоьнан Лакхарчу кхело юхаийцира дIахьедар процессуалан низамаш дохийна аьлла, оцу тIехула Ражаевна кхечу тутмакхашка кехаташ яздар могуьйтуш бина процессуалан сацам ницкъбе бисира.
Дагестанан Лакхарчу кхело 2012-чу шарахь велла дIаваллалц набахтехь яккха хан туьйхира Ражаев Мансурна. Талламан а, кхелан а версица, 1999-чу шеран гезгамашин-баттахь, Ражаев юкъахь а волуш, тIемалоша вийнера дагестанхойн Тухчар эвлахь МВД-н ялх тIеман йийсархо. Ражаевс дIахьедора, ша цаьрца вара, амма цхьа а вийна вац ша бохуш.
Хьалхо Ражаевс ФСИН-ра ши эзар сом даьккхира Хабаровскан кIоштара "Снежинка" колонин администрацино адвокаташца а, кхелашца а нохчийн маттахь къамелдан дехкара шена аьлла.
Велла дIаваллалц набахтехь таIзар такха кхел йинчу Ражаев Мансура Оьрсийчоьнан финансийн министралле кховдийна иск ах къобалйира Нохчийчоьнан Лакхарчу кхело, низамечу хенахь цуьнан кхелан гIуллакхах йистъяьккхина цахиларна. ГIаттамхо лаьттинчо шена динчу зенна дуьхьал 300 эзар сом тIедожийнера, кхело иттозза лахбира оцу ахчанан барам.
Иштта таIзар динчо дIахьедора, Соьлжа-ГIалахь 2007-чу шарахь оперативан- лехаман декъехь шена тIехь гIело хьегарх, иштта милцоша даредайтинера цуьнга терроран зуламашна. ЕСПЧ-кхело цуьнан тIедахкарш бакъонца ду аьлла, 52 эзар евро ахча кхачийра цунна.