Թրամփի՝ Սերժ Սարգսյանին ուղղված ուղերձից հասկացվում է, որ ուշադրություն է դարձվելու ՌԴ-ի դաշնակից Հայաստանի ռազմաքաղաքական քայլերին. Էդուարդ Աբրահամյան
Մեծ Բրիտանիայի Լեսթերի համալսարանի հետախուզության, անվտանգության ու ռազմավարության բաժնի գիտաշխատող, վաշինգթոնյան Կենտրոնական Ասիայի և Կովկասի ինստիտուտի տարածաշրջանային անվտանգության հարցերով անկախ փորձագետ Էդուարդ Աբրահամյանի կարծիքով՝ ԱՄՆ նախագահ Դոնալդ Թրամփի՝ Սերժ Սարգսյանին Հայաստանի Հանրապետության անկախության առթիվ ուղղված ուղերձը գրողը խորապես տիրապետում է այսօրվա Հայաստանում տիրող ներքին և արտաքին քաղաքական իրավիճակին և զարգացումներին։
Նա Tert.am-ի հետ զրույցում նկատեց, որ ՆԱՏՕ-ի գլխավորած զորավարժությանը Հայաստանի մասնակցության մասին հակիրճ ուղերձի մեջ նշելը պատահական չէր: «Համոզված եմ, եթե Հայաստանը մասնակցեր նաև երկրորդ՝ ԱՄՆ-ի գլխավորած զորավարժությանը, ապա դա նույնպես այս ուղերձում տեղ կգտներ»,- ասաց նա:
Հիշեցնենք, որ Հայաստանի Անկախության տոնի առթիվ նախագահ Սերժ Սարգսյանին շնորհավորական ուղերձ է հղել Ամերիկայի Միացյալ Նահանգների նախագահ Դոնալդ Թրամփը: Շնորհավորական ուղերձում, մասնավորապես նշված է․ «Մենք ձգտում ենք ընդլայնել մեր երկրների համար երկուստեք շահավետ առևտրային ու ներդրումային կապերը: Մենք նաև բարձր ենք գնահատում Հայաստանի մասնակցություն միջազգային խաղաղապահ գործողություններին և ՆԱՏՕ-ի ու այլ բազմազգ վարժանքներին, մասնավորապես այս տարվա ամռանը տեղի ունեցած «Ազնիվ գործընկեր» վարժանքին, որը գլխավորում էր ամերիկյան կողմը»:
Էդուարդ Աբրահամյանի խոսքով՝ ռազմաքաղաքական հարաբերությունների զարգացումը Հայաստանի հետ Թրամփի աշխատակազմը տեսնում և կարևորում է ոչ միայն երկկողմ, այլ առաջին հերթին բազմակողմ՝ ՆԱՏՕ-ի բազմաբնույթ պլատֆորմների շրջանակներում։
«Ուստի, պատահական չէ Հայաստանի դաշինքի կողմից ԱՄՆ առաջնորդությամբ իրականացվող բազմազգ զորավարժություններին մասնակցելու շեշտը»,- ասաց նա:
Ըստ նրա՝ դա նշանակում է, որ Արևելյան Եվրոպայում ռազմաքաղաքական զարգացումների ֆոնին ավելի մեծ ուշադրություն է դարձվելու Ռուսաստանի ֆորմալ դաշնակից Հայաստանի ռազմաքաղաքական քայլերին։
Դոնալդ Թրամփը Սերժ Սարգսյանին ուղղված ուղերձում անդրադարձել էր նաև սիրիացի փախստականներին Հայաստանի՝ օժանդակելուն, նշել էր, որ գնահատում են Հայաստանի ցուցաբերած աջակցությունը սիրիացի փախստականներին: Էդուարդ Աբրահամյանը նշեց, որ ուղերձում եղած այս տողերը դժվար թե պատասխանը լինեն նախագահ Սերժ Սարգսյանի՝ ՄԱԿ-ում ունեցած ելույթին, որտեղ վերջինս նշել էր, որ Հայաստանը պատրաստակամ է մասնակցելու Սիրիայում ՄԱԿ-ի ներքո խաղաղարար ջանքեր ձեռնարկելու շուրջ հնարավոր քննարկմանը: Նրա կարծիքով՝ Հայաստանը ԱՄՆ-ի կողմից ընկալվում է որպես մի երկիր, որը տարածաշրջանում առավել քանակությամբ փախստականներ է ընդունել Սիրիայից։
«Չեմ կարծում, որ Ռուսաստանի պսեվդո խաղաղապահ ծրագրերին մասնակցող երկրին ՄԱԿ-ում մանդատ տան»,- ասաց նա: