Այսօր մեդիատիրույթում ամենահզորն իշխանությունն է, իշխանության դեմ այս առումով խաղ չկա. Էդմոն Մարուքյան (տեսանյութ)
Իշխանությունը դժգոհում է, թե մեդիաներն իրենց չեն պատկանում, իմացեք, որ այսօր մեդիատիրույթում ամենահզորն իշխանությունն է։ Այսօր գործող իշխանության դեմ այս առումով խաղ չկա։ Այսօր իր ֆեյսբուքյան ուղիղ եթերի ժամանակ հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանը` խոսելով սահմանադրական փոփոխություններին զուգահեռ ընթացող սուտ մատնությունների մասին:
Մարուքյանի խոսքով` ներկայումս սուտն ու կեղծիքը շատացել են, և մարդիկ ստիպված պետք է շատ ստեր հերքեն։ Սակայն, ըստ նրա, փորձը ցույց է տալիս, որ հերքելը շատ ժամանակ արդյունավետ չէ: Մարուքյանը ներկայացրեց, որ իր անձի վերաբերյալ ստերից մեկն այն է եղել, որ ինքն մասնակցել է ՀՀ երկրորդ նախագահ Ռոբերտ Քոչարյանին ազատ արձակելու նպատակով իրականացված ստորագրահավաքին։
«Հետո նայում ենք, թե սուտը որտեղից է ծնվել: Պետք է մեր վարչապետի խոսքերը օգտագործեմ` 1in.am-ում աշխատող «շնաբարո դուրսպրծուկ», նպատակ ունենալով մեր լավատեսությունը քաշել ու տանել, մարդկանց լավատեսությունը մեր նկատմամբ ոչնչացնել, իր ֆեյսբուքյան պատի վրա նյութ է գրում»,- ասաց նա և հավելեց, որ նյութը, որտեղ ասվում է, որ Մարուքյանը ստորագրել է Ռոբերտ Քոչարյանի համար, մի քանի անհասկանալի կայքեր վերցրել են և սկսել տարածել:
Մարուքյանի դիտարկմամբ` նյութը նախապես համաձայնեցված է եղել ավելի բարձր դիրքեր ունեցող անձանց հետ, սակայն տարածումից հետո նյութի հեղինակն իր էջից հեռացրել է այն: «Սուտ համար մեկ. ես նման բան չեմ ստորագրել, չէի կարող ստորագրել, նման բան գոյություն չունի, բայց մեր մասին ստերը անընդհատ շարունակելու են տարածել»:
«Երկրորդ սուտն այն է, որ մենք և ՀՅԴ-ն աջակցում ենք «Ոչ»-ի շտաբին։ «Լուսավոր Հայաստան»-ը դեմ է քվեարկել հանրաքվեի որոշմանը, մանրամասն ներկայացրել է հակասահմանադրական գործընթացը և հայտարարել է, որ հակասահմանադրական գործընթացում չի զբաղվելու որևէ քարոզչությամբ՝ ո՛չ «Ոչ»-ի, ո՛չ «Այո՛»-ի»։
Պատգամավորը նշեց, որ «Լուսավոր Հայաստան» կուսակցության անդամներից լիցենզիա ստացած շատ անձինք ցանկացել են հանրաքվեի ժամանակ որպես հանձնաժողովի անդամ լինել, սակայն իշխանությունը, իր ներկայացմամբ՝ իրար է խառնվել։ «Մարդիկ վախենում են, որ հանձնաժողովում գրագետ մարդիկ են ներգրավվում։ Կարո՞ղ է ուզում եք հանրաքվեն կեղծել, դրա համար եք խառնվել իրար։ Չգիտեմ, չեմ ուզում ես խառնվել այն ամենի մեջ, բայց իմացեք, որ դա էլ է սուտ»։
Հաջորդ սուտը Մարուքյանի ներկայացմամբ այն է, որ Երևանի ավագանու «Ելք» խմբակցության անդամներից մեկը տարածել է, թե Դավիթ Խաժակյանը հանդիպել է «Ադեկվադ» միաբանության անդամների հետ։ Մարուքյանը հիշեցրեց, որ տարածված լուսանկարը երկու տարվա վաղեմություն ունի և արվել է այն ժամանակ, երբ Խաժակյանն ու «Ադեկվադի» անդամները հաղորդման հյուր են եղել։
Վերջինիս խոսքով՝ այս ամենը սարսափելի հակաքարոզչություն է․ «Տեսնում եմ, որ այսօր անբարոյականությունը սահմաներ չունի։ Ցանկացած բան, ցանկացած մարդու մասին կարելի է ասել, տեսանյութ պատրաստել»,- ասաց նա և հավելեց, որ նման դեպքերում, սակայն, դատի տալն անիմաստ է, քանի որ շատ նյութեր անհեղինակ են։
Մանրամասները՝ տեսանյութում