Չպետք է թույլ տալ, որ կորոնավիրուսով պայմանավորված տագնապ լինի հասարակության շրջանում. սա արդեն քաղաքական դիրքորոշման հարց է. տնտեսագետ
Փակ սահմաններն ունենում են իրենց բացասական հետևանքները, հատկապես բարեկամ երկրների հետ ինչպիսին է Իրանի Իսլամական Հանրապետությունը. այս մասին Tert.am-ի հետ զրույցում ասաց տնտեսագետ, ՀՅԴ Էկոնոմիկայի և ֆինանսների հանձնախմբի նախագահ Արմեն Գրիգորյանը՝ անդրադառնալով Իրանի հետ փակ սահմանի տնտեսական հետևանքին և թե ինչով դրանից կտուժի Հայաստանը:
«Իրանի հետ առևտրաշրջանառությունն ավելացնելու հսկայական պոտենցիալ կա, ցավոք 2019 թվականի ցուցանիշները արտահանման հատվածը շուրջ 10.3 մլն դոլարի չափով անկում են գրանցել 2018 թվականի նկատմամբ 94.2 մլն դոլարից դառնալով 83.9 մլն դոլար: Ներմուծումն ավելացել է, ավելացնելով նաև ներմուծում-արտահանում հարաբերակցության բացասական սալդոն: 2019 թվականին Հայաստանի Հանրապետությունն Իրանից ներմուծել է 324.93 մլն դոլարի ապրանք»,- ասաց նա:
Տնտեսագետը նկատեց, որ մենք հիմնականում արտահանում ենք էլեկտրաէներգիա, որն ամբողջ արտահանման մեջ ունի ավելի քան 90 % տեսակարար կշիռ: «Այս իմաստով փակ սահմանները խնդիրներ չեն հարուցի, իսկ ոչխարի մսի կամ մետաղի ջարդոնի արտահանման դեպքում դժվարություններ կլինեն: Չնայած նրան, որ ՀՀ կառավարությունը որոշել է բեռանփոխադրումներին չխոչընդոտել, այնուամենայնիվ տնտեսական գործունեություն իրականացնելու մեջ կան ռիսկեր, ինչն էլ տնտեսվարողներին որոշումներ կայացնելու մեջ կանգնեցնում է դժվարությունների առաջ, քանի որ հայտնի չէ, թե կորոնավիրուսն ինչ մասշտաբների կհասնի և ԻԻՀ կառավարությունն ինչ կորոշի»,- հայտարարեց նա:
Արմեն Գրիգորյանը նշեց, որ Հայաստանն Իրանից ներմուծում է նավթամթերքի մի շարք տեսակներ, գյուղատնտեսական և հանքարդյունահանման մեջ օգտագործվող պարարտանյութեր, շինարարական ապրանքներ և այլն: Վիրուսի մասշտաբների հնարավոր մեծացմանը զուգահեռ, կարող են ժամանակավորապես դադարեցվեն որոշ գործունեություններ, ինչի օրինակն արդեն կա Չինաստանում:
Հարցին, եթե Նովրուզի հետ կապված սահմանը բացվի, ինչ վտանգներ կլինեն, չնայած նրան, որ իշխանության ներկայացուցիչները նշում են վտանգի դեպքում սահմանը չի բացվի, Գրիգորյանը պատասխանեց. «Նովրուզը մահմեդական երկրների նոր տարին է, որը նշվում է գարնան գիշերահավասարին: Որքանով տեղյակ եմ դա մարտի 20-22 ընկած ժամանակահատվածն է, իսկ այդ ընթացքում Հայաստան են այցելում ավելի քան 40,000 իրանցի զբոսաշրջիկներ: Եթե սահմանը փակ մնա, ապա դա ուղղակի ազդեցություն կունենա տնտեսության վրա»:
Իսկ ինչ վերաբերում է վտանգներին նա նշեց, որ վտանգներ կլինեն, եթե Հայաստանում չսկսվի իրազեկման լայնամասշտաբ քարոզչություն հասարակության շրջանում: «Չպետք է թույլ տալ, որ տագնապ լինի հասարակության շրջանում, իսկ մենք՝ անպատրաստ: Կարելի է բժիշկների խումբ ուղարկել Իրան՝ խնդրին ավելի մոտիկից ծանոթանալու, օգնելու և սեփական լուծումներ ունենալու համար: Սա արդեն քաղաքական դիրքորոշման խնդիր է»,- նշեց նա:
Անդրադառնալով ստեղծված իրավիճակից Հայաստնում հնարավոր թանկացումներին տնտեսագետը նշեց, որ Հայաստան-Իրան միջպետական սահմանը, եթե երկար փակ մնա կամ նվազի անհրաժեշտ քանակի ապրանքների ներմուծումը, իսկ դրանց պակասը լրացվի այլ երկրներից ներմուծմամբ, դա կենթադրի տրանսպորտային ծախսեր, իսկ որոշ ապրանքների համար զգալի թանկ են նաև ձեռքբերման գները, օրինակ` ազոտական պարարտանյութերը, հեղուկ գազը: «Հույս ունեմ բանը դրան չի հասնի և Իրանը շատ արագ դուրս կգա այս վիճակից և չի ընկնի վիրուսի ճանկը»,- եզրափակեց նա: