Ամերիկյան դատարանը մեղավոր է ճանաչել ռուսաստանցի ցանցահենին

Սան Ֆրանցիսկոյում Կալիֆորնիայի նահանգի Հյուսիսային շրջանային  դատարանը կիբերհանցագործությունների համար մեղավոր է ճանաչել ռուսաստանցի ցանցահեն Եվգենի Նիկուլինին:

Ամբաստանյալը մեղադրվում է 8 տարի առաջ հաքերային գրոհների եղանակով LinkedIn, Dropbox և տեղեկատվական ոլորտում աշխատող այլ ընկերությունների կայքերը կոտրելու և կարևոր տվյալներ գողանալու մեջ:

Սան Ֆրանցիսկոյի դատարանը պետք է սեպտեմբերի 29-ին հրապարակի վճիռը:

32-ամյա Նիկուլինը հերքում մեղադրանքը, որով կարող է դատապարտվել մինչև 30-ը տարվա ազատազրկման:

Դատարանը Նիկուլինին պարտադրել է ենթարկվել բժշկական ստուգման, այդ թվում՝ հոգեբանի կողմից:

Նիկուլինի փաստաբան Արկադի Բուխը «մեծ անարդարություն» է անվանել դատարանի որոշումը և հայտարարել է, որ 60 օրում այն անպայման կբողոքարկի:

Ըստ մեղադրող կողմի, Նիկուլինը փորձել է վաճառել գողացած օգտահաշիվները և գաղտնաբառերը:

Նա սոցցանցերի տասնյակ միլիոնավոր օգտատերերի անուններ և գաղտնաբառեր է գողացել և դրանց մի մասը վաճառքի է հանել ռուս հաքերների առցանց հարթակում:

Նիկուլինին ձերբակալել են 2016 թվականի հոկտեմբերին Չեխիայում և 17 ամիս անց արտահանձնել են ԱՄՆ:

Մոսկվային զայրացրել է Պրահայի որոշումը: Ռուսաստանը Չեխիային առաջարկել է Նիկուլինին արտահանձնել, որտեղ նա կասկածվում է 2009 թվականին համացանցի միջոցով 2 հազար դոլար գողանալու համար:

Նիկուլինի դատը Կալիֆորնիայում պետք է մեկնարկեր մարտ ամսին, սակայն հետաձգվել է կորոնավիրուսի համավարակի պատճառով:

Նիկուլինը Միացյալ Նահանգների իրավապահների ուշադրության կենտրոնում է հայտնվել ռուս հաքերներին և կիբերհանցագործներին բացահայտելու երկարատև հատուկ գործողության ընթացքում:

Այդ գործողության շնորհիվ ամերիկացիները կարողացել են տարբեր երկրներում կալանավորել ռուսաստանցի մի քանի տասնյակ առցանց հանցագործների: 

Մոսկվան դրա համար քննադատել է Վաշինգթոնին և գործողությունն անվանել է «ռուսաստանցիների որս»: