2020-ի հունվար-մարտին ԱՄՆ-ում տնտեսության 33 տոկոսանոց անկում է արձանագրվել
Շուրջ 33 տոկոս անկում առաջին եռամսյակում. ամերիկյան տնտեսությունն նման հարված չէր ստացել ավելի քան յոթանասուն տարի`1947 թվականից ի վեր:
Վերջին` ամենամեծ անկումը գրանցվել էր վիետնամական պատերազմի տարիներին, սակայն անգամ այն ժամանակ այդ ցուցանիշը տասը տոկոսը չէր գերազանցել: Մինչդեռ այսօր աշխարհի տնտեսապես ամենահզոր պետությունն աննախադեպ կորուստներ է արձանագրում. ավելի քան յոթ ամիս շարունակվող համաճարակի պատճառով հազարավոր բիզնեսներ փակվել են, միլիոնավոր ամերիկացիներ նստած են տանը` գործարկության նպաստի հույսին: Ընդ որում, ամենամտահոգիչն այն է, որ որևէ մեկը չի կարող ճշգրիտ կանխատեսել, թե երբ կհանվեն սահմանափակումները և հնարավոր կլինի ամբողջ թափով վերագործարկել տնտեսությունը. ԱՄՆ Կենտրոնական բանկի նախագահ Ջերոմ Փաուելը նախօրեին փաստեց, որ ապագան մնում է «ծայրաստիճան մշուշոտ». - «Տնտեսության վերականգման ճանապարհը, ինչպես հայտարարել ենք համաճարակի ողջ ընթացքում, չափազանց անորոշ է և մեծապես կախված է այն հանգամանքից, թե որքանով կհաջողենք վերահսկողության տակ պահել վիրուսի տարածումը»:
Առայժմ այս ուղղությամբ, էական առաջընթաց չի երևում. վիրուսի տարածման ու մահվան ցուցանիշներով աշխարհում առաջին տեղը զբաղեցնող երկրում երեկ կրկին նոր դեպքերի աճ է գրանցվել`մեկ օրում ավելի քան 68 հազար վարակակիր, ընդհանուր ցուցանիշը հասել է 4,6 միլիոնի, զրդեն մահացել է 155 հազարից ավելի մարդ:
Նախագահ Թրամփը անցած շաբաթ փաստել էր, որ իրավիճակը լավ չէ և առաջիկայում կարող է է՛լ ավելի վատանալ. - «Մեր երկրի որոշ շրջաններում վիճակը շատ լավ է, որոշ տեղերում`ոչ այնքան: Իրավիճակը թերևս կվատանա մինչև կարգավորվելը: Ես չէի ուզի նման բան ասել, բայց դա է իրականությունը»:
Համավարակը չի նահանջում նաև Բրազիլիայում
Համավարակի տարածման տեմպերով երկրորդն աշխարհում շարունակում է մնալ Բրազիլիան, որի նախագահ Ժաիր Բոլսոնարուն ամիսներ շարունակ հերքում էր Covid-19 ի վտանգավորությունն ու պնդում, թե դա հասարակ գրիպից ոչնչով չի տարբերվում: Հիմա 65-ամյա առաջնորդը սեփական մաշկի վրա է զգում տարբերությունը. ամսվա սկզբին կորոնավիրուսով վարակվելուց, շուրջ քսան օր մեկուսանալուց և բուժվելուց հետո, երեկ նա հայտարարել է, թե դեռ լավ չի զգում իրեն: Բացի այդ, վարակը հաստատվել է նաև նրա տիկնոջ` Միշելի մոտ:
«Հենց նոր արյան թեստ հանձնեցի, քանի որ երեկ թուլություն էի զգում: Մի փոքր սնկային վարակ ունեմ թոքերիս մեջ, և հիմա հակաբիոտիկներ եմ խմում», - ասել է Բոլսոնարուն:
Թե ինչ սնկային վարակի մասին է խոսքը, Բրազիլիայի նախագահը չի մանրամասնել: Ավելի վաղ`անցած շաբաթ, նա հայտարարել էր, թե ամբողջովին ապաքինվել է կորոնավիրուսից «Հիդրոքսիլ Քլորոքուին» դեղամիջոցի շնորհիվ, որի արդյունավետությունը բժիշկներից ու գիտնականներից շատերն են կասկածի տակ դնում:
Մտահոգիչ միտումներ Եվրոպայում
Վերջին օրերին մտահոգիչ միտումներ են նկատվում նաև Եվրոպայում. որոշ երկրներում խոսում են վարակի երկրորդ ալիքի մասին: Մեծ Բրիտանիայում երեկ արձանագրվել է վարակվածության ամենաբարձր ցուցանիշը անցած մեկ ամսվա մեջ` ավելի քան 800 դեպք: Վարչապետ Բորիս Ջոնսոնն այսօր որոշել է սառեցնել սահմանափակումների վերացումն ու վերստին կարանտին հայտարարել Հյուսիսային Անգլիայում:
«Ստիպված ենք», - երեկ բացատրում էր Առողջապահության նախարար Մեթ Հենքոքը`դիմելով այդ շրջանների մոտ չորս միլիոն բնակիչներին: - «Այս կեսգիշերից կարգելվի հյուրեր ընդունել և հավաքներ անցկացնել: Դժբախտաբար, դա անհրաժեշտ է, քանի որ այդ հանդիպումները, ինչպես նաև սոցիալական հեռավորության անտեսումը դարձել են վարակի տարածման պատճառներից մեկը»:
Ֆրանսիայում ևս մի քանի օր է` 24 ժամում 1000-ից ավելի նոր դեպք է գրանցվում, ինչն աննախադեպ է մայիսյան պիկից հետո: Տարածման տեմպը կոտրելու համար Առողջապահության նախարարը հատուկ լիազորություն է տվել քաղաքապետերին. այսօրվանից նրանք կարող են միանձնյա որոշում կայացնել և պարտադիր դարձնել դիմակները բացօթյա տարածքներում: Փակ տարածքներում դրանք պարտադիր են հուլիսի 20-ից:
Վիետնամում գրանցվել է առաջին մահը
Առայժմ իրավիճակի բարելավվում չի նկատվում նաև ասիական տարածաշրջանում: Ճապոնիայում, ըստ պաշտոնական աղբյուրների, երեկ արձանագրվել է ավելի քան 1300 նոր դեպք, ինչը տասն անգամ գերազանցում է մեկ ամիս առաջ` հունիսի վերջին գրանցված ցուցանիշը: Տոկիոյի նահանգապետը չի բացառել, որ առաջիկայում տեղում կարող է արտակարգ դրություն մտցվել:
Դեպքերի ռեկորդային աճ է գրանցվել նաև Վիետնամում, որը մինչ օրս համարվում էր համաճարակի դեմ պայքարի ամենահաջողված օրինակներից մեկն աշխարհում: Մոտ հարյուր միլիոն բնակիչ ունեցող երկրում ավելի քան երեք ամիս վիրուսի որևէ դեպք չէր գրանցվել: Շաբաթասկզբին, սակայն, դրական այդ միտումը կոտրվեց: Պարզվեց, որ նոր օճախ է բռնկվել զբոսաշրջիկների նախասիրած հանգստավայրերից մեկում` Դանանգ քաղաքում: Այսօր այստեղ վարակի 45 նոր դեպք է գրանցվել, մահացել է 70-ամյա մի տղամարդ. նա այս կորոնավիրուսի առաջին զոհն էր Վիետնամում համաճարակի բռնկումից ի վեր: Տեղի իշխանությունները, որ նախինում մի քանի անգամ արդեն պայքարել են մահաբեր վիրուսների, այդ թվում`նախորդ կորոնավիրուսի` Sars-ի դեմ, արձագանքել են կտրուկ գործողություններով. առողջարանային քաղաքը կարանտինի մեջ է, իսկ մայրաքաղաքում սկսվել է զանգվածային թեստավորում` նոր բռնկումները կանխելու համար: