Փաշինյանը ստախոս է, իր արածն անբարոյականություն է․ Կարեն Վրթանեսյանը՝ «Իսկանդերի» մասին Նիկոլ Փաշինյանի հայտարարության վերաբերյալ
Տեխնիկական «բռակ» ցանկացած սպառազինություն էլ կարող է ունենալ, բայց տվյալ դեպքում կատարյալ անհեթեթություն է պնդել, թե պայթել է 10 տոկոսով, դա աբսուրդ է, նման բան չկա։ Այս մասին Tert.am-ի հետ զրույցում ասաց ռազմական փորձագետ Կարեն Վրթանեսյանը՝ անդրադառնալով Նիկոլ Փաշինյանի հայտարարությանը, ով ասել էր, թե նախկին իշխանությունները գուցե պատասխանեն, թե ինչու կրակած «Իսկանդեր»-ը չի պայթել կամ պայթել է, օրինակ՝ 10 տոկոսով։
«Նիկոլ Փաշինյանը, իհարկե, հաստատ չի ասում, բայց այնպիսի տպավորություն է ստեղծում, թե իբր «Իսկանդեր»–ը չի պայթել։ Դա կատարյալ սուտ է, Նիկոլ Փաշինյանը ստախոս է»,–ասաց նա։
Ռազմական փորձագետն ասաց, որ ցանկացած դեպքում, հաշվի առնելով արագությունները, ճնշումները, որ ազդում են թռիչքի ժամանակ, ինչ–որ բան տեսականորեն կարող է շարքից դուրս գալ, բայց Հայաստանի դեպքում նման բան չի եղել։ Ըստ նրա՝ Նիկոլ Փաշինյանը փորձում է մարդկանց մոլորեցնել, իր սխալներից շեղել և տպավորություն է ստեղծում, թե իբր այդ հրթիռը չի պայթել։
Իսկ հրթիռի 10 տոկոս պայթելու հայտարարության մասին Կարեն Վրթանեսյանն ասաց, որ դա ընդհանրապես աբսուրդ է և նույնիսկ չարժե քննարկել։ «Դա կրակել են հակառակորդի վերահսկողության տակ եղած թիրախի ուղղությամբ։ Այո, իմ ունեցած տեղեկություններով Շուշիի վրա են կրակել, բայց չպայթելու թեմա չի եղել։ Այն, ինչ անում է Նիկոլ Փաշինյանը, կատարյալ անբարոյականություն է»,– ասաց նա և նշեց, որ «Իսկանդեր»–ը լիարժեք աշխատել է։
Նա նկատեց, որ Նիկոլ Փաշինյանն անում է ակնհայտ կեղծ հայտարարություններ, որոնք րոպեների ընթացքում հերքվում են, շատ հաճախ ինքը իրեն է հակասում և ինքը իրեն է հերքում։ «Սա առաջին դեպքը չէ, երբ Նիկոլ Փաշինյանը հարվածում է հայ–ռուսական հարաբերություններին, դրա հետևանքները մենք տեսանք նաև պատերազմի ժամանակ»,–ասաց նա։