Նախագահն ուներ 3 օր, որ այդ փաստաթուղթն ուղարկի ՍԴ, այդ ժամկետն անցավ՝ չուղարկեց․ Վազգեն Մանուկյանը՝ ԳՇ պետի ազատման մասին (տեսանյութ)
Եթե երկիրդ գրավել է թշնամին, ուրեմն իր դեմ պայքարելու բոլոր ձևերը օրինական են, բայց մենք ընտրեցինք քաղաքական ճանապարհը: Մենք տեսանք, որ քաղաքացիների ինչ- որ մաս շարունակում է հավատալ Նիկոլ Փաշինյանին, մենք հարգեցինք մեր քաղաքացիներին և ասեցինք՝ քարոզչության միջոցով այնպես անենք, որ ամբողջ Հայաստանը կանգնի մեր կողքը. Բաղրամյան պողոտայում հանրահավաքի ժամանակ ասաց «Հայրենիքի փրկության շարժման» վարչապետի թեկնածու Վազգեն Մանուկյանը:
«Նախագահն ուներ 3 օր, մեր պահանջն էր, որ այդ փաստաթուղթը ուղարկի ՍԴ, երեք օրվա ժամկետը անցավ՝ չուղարկեց, բայց իրավաբանները շատ խորամանկ մարդիկ են, իրենք գտան միջոց: Ձևը այս է՝ մինչև ամսի 8-ը Օնիկ Գասպարյանին պաշտոնաթող անել չեն կարող, արանքում նախագահն նորից պետք է միջամտի Սահմանադրական դատարան, այդ իրողությունը բացատրվեց, մեր պատվիրակությանը, որը նոր այցելեց նախագահական գրասենյակ: Այսինքն՝ այն, ինչ ուզում էինք, չստացանք, ստացանք՝ կիսատ- պռտատ, դա նշանակում է, որ մենք այսօր պետք է ոչ թե տոնենք հաղթանակ, այլ ասենք, որ մի քայլ ևս արեցինք, բայց առջևում ունենք պայքարելու ժամանակ: Բայց մի բան կար, որ ավելի կարևոր է, իմ տեղեկութուններով, բանակի ղեկավարությունն ասեց, որ չի ենթարկվելու անօրինական կարգադրությունների և ինչ ուզում են որոշեն տարբեր ատյանները՝ նախագահը, կառավարությունը և մյուսները, բանակն ոնց կանգնած կա, այդպես էլ մնալու է»,- ընդգծեց նա:
Մանուկյանի խոսքով՝ Օնիկ Գասպարյանի հարցը չէ միայն, այլ ամբողջ բանակի հարցն է. «Իրենք ինչպես միշտ խոստանում են՝ դուրս արի պաշտոնից, մի հատ լավ պաշտոն կտանք, ոչ մեկին ձեռք չենք տա: Իրականում բավական է մի տեղ թուլություն ցույց տաս, ջարդելու են մինչև վերջ, հանելու և ձերբակալելու են բոլոր կորպուսի հրամանատարներին: Այսինքն՝ մենք ոչ միայն պաշտպանում ենք Օնիկ Գասպարյանին, այլ ուզում ենք երկրորդ ջարդից բանակն ազատել»:
Մանուկյանի խոսքով՝ բանակից հետո հերթը պետք է հասնի Ոստիկանությանը, ըստ նրա՝ բանակի հայտարարությունը մեծ ազդեցություն է ունեցել Ոստիկանության վերաբերմունքի վրա։ Վազգեն Մանուկյանը խոսեց նաև ԱԺ-ում դիպուկահարների ներկայության մասին։
«Ենթադրենք մի քանի տաքարյուն երիտասարդ ուզենային դարպասով անցնել, ուրեմն հայ դիպուկահարը այնտեղից պետք է կրակե՞ր նրա ճակատին: Մենք այս շենքը մտնելու ենք իհարկե, բայց ոստիկանները բացելու են դուռը, մեզ ուղեկցելու են և մենք մտնելու ենք ներս: Նույն ձև իրենք մեզ կուղեկցեն, երբ մտնենք Կառավարության շենք, մեր նպատակը դա է, ոչ թե ոստիկանին ծեծելով շենք մտնելը, այլ հասնենք նրան, որ ինքը բացի դուռը ասի՝ համեցեք»:
Մանուկյանը նշեց, որ շարժման մասնակիցները 2-3 օր կայցելենք մարզեր, որպեսզի մարզերում իրենց ձայնը ևս հասանելի լինի. «Այնտեղ միայն Հ-1 են լսում, չկան «Արմնյուզը», մյուս հեռուստաընկերությունները, բայց իրենք նույն ձև հասկանում են, որ հայրենիք են կորցնում: Սա մեր շտաբն է, մեր փոքր հայրենիքն է, որտեղ հանդիպում ենք իրար և գնում անհնազանդության ակցիաներ անելու: Շարժման մասնակիցները կգնան շրջաններ և ավելի պարզված կլինի մեր կարգավիճակը: Շաբաթ ժամը 15։00-ին մեծ հանրահավաք կանենք, որտեղ ցույց կտանք, որ ամբողջ ժողովուրդն է մասնակցում: Կարող է իրավիճակը բերի նրան, որ մենք կատարենք շատ ավելի կտրուկ գործողություններ: Այս ժողովրդի մեջ 5000 երիտասարդ կան, որ շատ հիասթափվում են, ասում են գնանք այս շենքը վերցնենք․ սպասեք ձեր կարիքը կարող է լինել, բայց ավելի լավ կլինի, որ ձեր կարիքը չլինի, ինքն իրեն ամեն ինչ արվի»: