ՀՀ-ում չի կարող լինել ընտրություն, որը կանցկացնի երկիրը դավաճանած, հազարավոր մարդկանց «գլուխ կերած» անձը. ովքեր իր հետ փորձեն այդ գործընթացին մասնակցել, նրա հանցակիցներն են. Միհրան Հակոբյան
Մեր հասարակությունը «նոկաուտի» մեջ է հայտնվել երկրի դավաճանական իշխանության գործողությունների հետևանքով, բայց աստիճանաբար սկսում է արթնանալ: Այս մասին ընդդիմադիրների՝ Նիկոլ Փաշինյանի հրաժարականի պահանջով հանրահավաքից առաջ Tert.am-ի հետ զրույցում ասաց հասարակական-քաղաքական գործիչ Միհրան Հակոբյանը:
Ըստ Հակոբյանի՝ մենք կորցրել ենք ՀՀ-ն, այդպիսի պետություն այլևս գոյություն չունի, որովհետև այդ պետության իմաստը, գոյաբանությունը կապված էր Արցախի հետ:
«Այն մեզնից գողացել են՝ դավաճանական իշխանությունների գործունեության հետևանքով: Մենք այժմ գտնվում ենք նոր իմաստի, գոյաբանության որոնումների մեջ: Ինչքան էլ փորձենք այլ իմաստ գտնել, չի ստացվելու: Իմաստ ինչպես եղել է Արցախը, այնպես էլ կա: Մենք պետք է հասկանանք մի շատ կարևոր բան՝ Ղարաբաղի հարցում ունեցել ենք շատ լավ իրավիճակ թե՛ դիվանագիտության ոլորտում, թե՛ տարածքային առումով, թե՛ մարդկանց անվտանգության առումով: Այդ ամենը ՀՀ դավաճան իշխանությունների ստահակության, ապաշնորհության հետևանքով կորցրել ենք»,-ասաց նա՝ ընդգծելով, որ լավ երկիր ստեղծելու համար կա կարևորագույն նախապայման՝ Նիկոլ Փաշինյանն իր թիմի հետ պետք է հեռանա:
Անդրադառնալով Նիկոլ Փաշինյանի առաջարկին՝ ԱԺ արտահերթ ընտրությունների անցկացում իր օրոք, Միհրան Հակոբյանն ասաց՝ չի կարող ՀՀ-ում լինել ընտրություն, որը կանցկացնի երկիրը դավաճանած, կապիտուլացրած, հազարավոր մարդկանց «գլուխ կերած» անձնավորությունը:
«Մարտի 1-ի հանրահավաքն ամենացցուն օրինակն էր, որ չի կարելի Նիկոլ Փաշինյանին թողնել վարչապետի պաշտոնում, և նա արտահերթ ընտրություններ կազմակերպի: Հանրահավաքի ժամանակ մարդկանց կաշառքով, վախեցնելով, ադմինիստրատիվ ռեսուրսն օգտագործելով՝ լցնում էին հրապարակ՝ փորձելով ժողովրդի աջակցության պատրանք ստեղծել: Նիկոլ Փաշինյանն այդ ընտրությունները կեղծելու է, լցոնելու է: Նա չի կարող ընտրություն կազմակերպել, ովքեր իր հետ փորձեն այդ գործընթացին մասնակցել, առնվազն մոլորյալներ են, նրա հանցակիցներն են»,-ասաց Միհրան Հակոբյանը: