Ֆուտբոլի ֆեդերացիայի ղեկավարությանը քրեակատարողական ապագա է սպասվում․Է․ Մարուքյանը՝ Լոռու ֆուտբոլային ակումբի նկատմամբ ֆեդերացիայի իրականացրած քայլերի մասին (տեսանյութ)
ԱԺ «Լուսավոր Հայաստան» խմբակցության ղեկավար Էդմոն Մարուքյանը ֆեյսբուքյան էջի ուղիղ եթերում ներկայացրել է «Լոռի» ֆուտբոլային ակումբի նկատմամբ վերջերս տեղի ունեցածը:
«Հայաստանում շուրջ ութ ամիս է՝ ընթանում է ֆուտբոլի առաջնություն, այս պահին Լոռու թիմը երրորդ տեղում է։ Գիտեք՝ ինչ դժվար ճանապարհ է անցել «Լոռի» ֆուտբոլային ակումբը, և այս թիմի նկատմամբ այնպիսի ապօրինություններ են տեղի ունենում ֆուտբոլի ֆեդերացիայի նախագահի մակարդակով, որ ուղղակի մարդկանց նյարդերը տեղի են տալիս, անարդարությունների ծավալը այնքան մեծ է, այն մասշտաբի խայտառակություն է տեղի ունենում, որ Լոռու ֆուտբոլային ակումբի ղեկավարը հայտարարություն է տարածել, որ նա ստիպված է այս պայմաններում դուրս գալ Հայաստանի առաջնությունից»,–ասաց նա և նշեց, որ Լոռու թիմի ներկայացուցիչները երեկ խաղի դուրս չեն եկել։
«Սա ևս մեկ օրինակ է, ինդիկատոր է, որ բոլոր ոլորտներում խայտառակություն է եղել և այս իշխանության բերած կադրերը իրենց պահում են ամենավերջին խայտառակ ձևով, հիշեք Լևոն Արոնյանի հետ տեղի ունեցածը»,–ասաց նա։
Էդմոն Մարուքյանը դատապարտեց առկա անարդարությունները։ «Որքանով հասկանում եմ, այնտեղ քրեորեն հետապնդելի արարքների մասին բավականին փաստեր կան, շրջանառվում են նման տեղեկություններ։ Ես հիմնավոր կասկած ունեմ, որ ֆուտբոլի ֆեդերացիայի ղեկավարությունը ապագայում դուրս է մնալու ֆուտբոլային աշխարհից, անապագա վիճակ է»,-ասաց նա և նկատեց, որ Լոռու ֆուտբոլային թիմը ապագա ունի, այդ ապագան լուսավոր է:
«Այ ֆուտբոլի ֆեդերացիայի ղեկավարության ապագան ապագա չէ, քրեակատարողական ապագա է սպասվում այդ մարդկանց։ Հետամուտ ենք լինելու մինչև վերջ, պատասխան եք տալու, չեք մարսելու ոչ մի ձև»,–ասաց նա։