Ախտանշանային ձևերի կանխարգելման համար «AstraZeneca»–ի արդյունավետությունը 76 % է, իսկ ՀՀ–ում շատ ծանր համաճարակային իրավիճակ է, կա մոտ 90 տոկոսով հիվանդության աճ․ Գ․ Սահակյան
Առողջապահության նախարարության Հիվանդությունների վերահսկման և կանխարգելման ազգային կենտրոն տնօրենի տեղակալ Գայանե Սահակյանն այսօր մամուլի ասուլիսին հայտնեց, որ 24 հազար դեղաչափ խմբաքանակով Հայաստանի Հանրապետություն է ներկրվել «AstraZeneca» ընկերության պատվաստանյութը՝ «COVAX FACILITY» նախաձեռնության շրջանակներում: Այն նախատեսված է ռիսկի խմբերի շրջանում, մասնավորապես՝ բուժաշխատողների, 65 տարեկան և բարձր տարիքի անձանց, քրոնիկ հիվանդների, տարեցների խնամքի կենտրոնների բնակիչների և աշխատակիցների, սոցիալական խնամքի կենտրոնների աշխատակիցների, կամավորության սկզբունքով, կորոնավիրուսային հիվանդության (COVID-19) դեմ պատվաստելու համար:
«Սա չի նշանակում, որ այս էտապում միայն այդ պատվաստանյութն ենք ձեռք բերելու, աշխատանքը COVAX նախաձեռնության հետ շարունակվում է և առաջիկայում նոր պատվաստանյութեր ևս կառաջարվկեն Հայաստանի Հանրապետությանը»,–ասաց Գայանե Սահակյանը և նշեց, որ «AstraZeneca»–ն իր կլինինիկական փորձարկումների փուլերը ավարտել է և այն կատարվում է միջմկանային ճանապարհով։
Ինչ վերաբերում է արդյունավետությանը, ապա Գայանե Սահակյանը նշեց, որ արդեն հայտնի է վերջին հետազոտության արդյունքները։ «Ախտանշանային ձևերի կանխարգելման համար արդյունավետությունը գնահատվում է 76 տոկոս, սա նշանակում է, որ պատվաստված անձանց մոտ ախտանշաններ չեն զարգանում 76 տոկոսով, բայց պատվաստանյութը բավականին արդյունավետ է՝ ծանր դեպքերի կանխարգելման, հոսպիտալացումների և մահերի կանխման առումով՝ գրեթե հարյուր տոկոսով»,–ասաց նա։
Նա նշեց, որ ինչպես բոլոր երկրները, այնպես էլ Հայաստանը իր առաջ խնդիր է դրել՝ առողջապահական բեռի նվազեցում, այսինքն՝ մահերի կանխարգելում, հոսպիտալացումների կրճատում, ծանր դեպքերի կանխում, և այս պատվաստանյութը բավարարում է այդ նպատակների հասանելիությունը։
«ՀՀ–ում այս պահին շատ ծանր համաճարակային իրավիճակ է, մեր հիվանդանոցային համակարգը բավականին ծանրաբեռնված է, մահճակալային ֆոնդը համարյա սպառվում է և ունենք մոտ 90 տոկոսով հիվանդության աճ։ Առաջիկա շաբաթվա ընթացքում մենք սպասում ենք ավելի քան 7 000 նոր դեպքեր, սա շատ բարդ իրավիճակ է, քանի որ այդ դեպքում ամբողջովին մահճակալային ֆոնդը կսպառվի»,–ասաց նա և նշեց, պատվաստանյութի հակացուցումները շատ սուղ են և լուրջ հետպատվաստումային անբարեհաջող դեպք չի գրանցվել։
«Կան սպասվող և չսպասվող հետպատվաստումների ռեակցիաներ։ Առաջին դեպքում՝ ներարկման ցավ, այտուց, ընդհանուր թուլություն, և 40–50 տոկոսում դրանք կարող են առաջանալ, բայց դա կարճ ժամանակում անցնում է։ Կան նաև չսպասվող ռեակցիաներ, որոնք օրգանիզմի առանձնահատուկություններով են պայմանավորված»,–ասաց նա։
Գայանե Սահակյանը հայտնեց, որ մինչև այսօր 20 միլիոնից ավելի «AstraZeneca»պատվաստանյութ է օգտագործվել և 11 միլիոնը՝ Անգլիայում, և հուսադրող տվյալներ կան, իսկ արտասավոր դեպք, մահվան դեպք չի հայտնաբերվել:
«Եթե մենք կարողանանք վստահություն առաջացնել մեր բնակչության շրջանում, պատվաստումները կազմակերպել, մենք կյանքեր կխնայենք,և ամբողջ առողջապահական բեռը կթեթևանա։ Շատերը մեղադրում են, թե էժան պատվաստանյութի ենք գնում, չկա այդպիսի բան, նույն «AstraZeneca»–ն միջազգային շուկայում նրա գինը բարձր է մինչև 25 դոլարի է հասնում, բայց քանի որ մենք ձեռք ենք բերել COVAX նախաձեռնության շրջանակում, որը արտադրողի հետ մեծ պայմանագիր է կապել՝ մոտ 170 միլիոն դեղաչափի, սա մեզ հնարավորություն է տալիս, բավականին մատչելի գնով ձեռք բերել, մեկ դեղաչափը՝ 4,5 ԱՄՆ դոլար»,–ասաց նա։
Նա նաև հայտնեց, որ այսօր կառավարությունում քննարկում է եղել և միջոցառումների ուժեղացման հանձնարարականներ են իջեցվել։