ԱՄՆ-ն բաց է Իրանի հետ դիվանագիտական փոխգործակցության համար. Սպիտակ տուն
Միացյալ Նահանգները նախկինի պես բաց է դիվանագիտական փոխգործակցության համար, որը թույլ կտար կողմերին վերադառնալ իրանական միջուկային հարցով Գործողությունների համատեղ համապարփակ ծրագրի իրագործմանը: «ՏԱՍՍ» գործակալության փոխանցմամբ՝ այս մասին հայտնել է Սպիտակ տան մամուլի քարտուղար Ջեն Փսակին:
«Մենք հավատարիմ ենք մնում դիվանագիտական գործընթացի շարունակությանը, որպեսզի որոշենք հետագա քայլերը: Երբեմն դրա համար ժամանակ է պետք, և մենք հստակ հասկացել ենք դա Իրանի հետ նախորդ բանակցություններից: Մենք պատրաստ ենք արդյունավետ դիվանագիտական փոխգործակցությունը վերսկսելուն, որպեսզի հասնենք նրան, որ երկու կողմերն էլ վերադառնան միջուկային ծրագրի իրագործմանը: Քննարկումներ և փոխգործակցություն սկսելու առաջարկն ուժի մեջ է մնում»,- ասել է Փսակին:
Աղբյուրը նշում է, որ ՄԱԿ-ում Իրանի մշտական ներկայացուցիչն այսօր ավելի վաղ գրառում էր կատարել՝ ընդգծելով, որ միջուկային գործարքին ԱՄՆ-ի վերադառնալու համար լրացուցիչ առաջարկներ պետք չեն, բավական է միայն «Վաշինգտոնի քաղաքական որոշումը»: