Փաշինյանն այս կերպ ուզում է լռեցնել սյունեցիներին, որպեսզի կարողանա ընտրությունների համար քարոզարշավ անցկացնեն. որևէ մեկը չի մասնակցելու իշխանության այս շոուին. Վահե Հակոբյան (տեսանյութ)
Իմ տեղեկություններով՝ Սյունիքից 20-ից ավելի մարդ է բերման ենթարկվել և ձերբակալվել, գրեթե բոլորը՝ ապօրինի, խաբելով, համոզելով, տեղ-տեղ էլ առևանգելով, մարդկանց նստեցրել են մեքենաներն ու անհայտ ուղղությամբ տարել: Այս մասին այսօր Քննական կոմիտեի շենքի դիմաց լրագրողների հետ զրույցում ասաց «Վերածնվող Հայաստան» կուսակցության նախագահ Վահե Հակոբյանը` խոսելով սյունեցիներին, համայնքների ղեկավարներին, քաղաքապետերին բերման ենթարկելու մասին:
Նշենք, որ բերման ենթարկվածների նկատմամբ քրեական գործ է հարուցվել, սակայն հստակ չի նշվում, թե որ քրեական գործի շրջանակներում են գործողություններ իրականացվում:
«Իշխանություն կոչվածները փորձում են մարդիկ գտնել, որոնք տեսախցիկի առաջ մեղա կգան իրենց արածների համար, որպեսզի ցույց տան, թե ժողովուրդը սխալվել է. որևէ մեկը չի մասնակցելու իշխանության այս շոուին»,- ասաց Հակոբյանը և հավելեց, որ այս ամենն իրականում իրականացվում է այն նպատակով, որպեսզի Փաշինյանը լռեցնի սյունեցիներին ու կարողանա ընտրությունների համար քարոզարշավ իրականացնի:
Խոսելով տեղեկության մասին, թե հիմա Սյունիքում են ԱԱԾ պետը, Երևանի ոստիկանապետը՝ Հակոբյանը նշեց, որ վերջիններս փորձում են, վախի մթնոլորտ ստեղծելով, Սյունիքում իրավիճակ փոխել:
Վահե Հակոբյանը նաև չբացառեց այն, որ Սյունիքի համայնքապետերին մարզից մեկուսացնելը կարող է կապ ունենալ Ադրբեջանի նախագահ Իլհամ Ալիևի կողմից հայտարարված ցանկությունների հետ, թե Մեղրիով պատրաստվում է միջանցք բացել: «Քանի սրանք են իշխանության՝ մենք չպետք է զարմանանք ոչ մի բանից, եթե վաղը թուրքն այստեղ դրոշ դնի, չզարմանաք, որովհետև սա նրանց ուղին է»:
Հիշեցնենք՝ Նիկոլ Փաշինյանի՝ Սյունիքի մարզ այցի ժամանակ սյունեցիները թույլ չեն տվել նրան մտնել համայնքներ: Բողոքի ակցիա է իրականացվել Սյունիքի տարբեր համայնքներում, որտեղ քաղաքացիները վանկարկել են «Նիկո՛լ, դավաճա՛ն, թո՛ւրք, հողատո՛ւ», հնչել են նաև տարբեր հայհոյանքներ և վիրավորանքներ, որոնց ներքո նա լքել է քաղաքները:
Փաշինյանը թիկնազորի ուղեկցությամբ մտել է Սյունիքի մարզպետարան և խորհրդակցություն անցկացրել, որի ընթացքում, մասնավորապես, նշել է. «Ես ուզում եմ անդրադառնալ այսօր Մեղրիում տեղի ունեցած միջադեպին․ հստակ է, որ տեղի է ունեցել օրենքի խախտում և ես ակնկալում եմ, որ հանրապետության իրավապահ մարմինները շատ հստակ և կոշտ կերպով կարձագանքեն իրավիճակին»: