Ամենայն հավանականությամբ Հայաստանում գործել և գործում է գործակալական ցանց, որը արյունոտ դիրիժորի ղեկավարությամբ քանդում է երկիրը, որոշում՝ քանի հազար տղա դնի Էրատոյի զոհասեղանին. Գեղամ Նազարյան
Tert.am-ը հրապարակում է «Ճշմարտություն սերունդների համար» նախաձեռնության ղեկավար Գեղամ Նազարյանի՝ «Արնախումներն արժանանալու են իրենց արժանի պատժին» վերտառությամբ հոդվածը:
Լրագրող, մեդիափորձագետ Նաիրի Հոխիկյանը նախօրեին սենսացիոն բացահայտումներ է արել. վերահաստատեց այն, ինչի մասին պնդում էին շատերը՝ Նիկոլը իշխանության է եկել Արցախը Ադրբեջանին հանձնելու համար: Ավելին, Նիկոլը իշխանության է եկել մեր տղերքին զոհելու գնով Արցախը Ադրբեջանին հանձնելու համար:
Դեռ 2019-ի մայիսին այս մասին արդեն բարձրաձայնում էին: Նիկոլի մամուլի խոսնակ Վովան՝ Վլադիմիր Կարապետյանը հայտնի բլոգեր Լապշինին ուղիղ տեքստով ասել է. «ժողովուրդը մի քանի հազար զոհ որ տա՝ լավ էլ կտա»: Խոսքը, բնականաբար, Արցախը Ադրբեջանին հանձնելու մասին է: Էդ մեր տղե՞րքն էին այդ մի քանի հազարը: Էդ մեր տղերքի կյա՞նքն էր ձեր համար մանրադրամ։
Ու դուք մտածում եք մարսելո՞ւ եք այս ամենը, հանգիստ ապրելո՞ւ եք: Այդքան լավատե՞ս եք: Այդքան կտրվա՞ծ իրականությունից: Չեք մարսելու: Վստահ եղեք: Մեկ անգամ, երբ Վլադիմիր Կարապետյանը դեսպան նշանակվեց, ես արդեն գրել եմ, թե ինչ էր ասում նա պատերազմի օրերին, երբ արդեն Նիկոլի մամուլի խոսնակը չէր: Հիմա վերահաստատում եմ:
Պատերազմի օրերին նրան պատահաբար երկու անգամ հանդիպեցի. Վովան Նիկոլին հայհոյում էր, վերջին բառերով արտահայտվում, ասում, որ շեղվել է ճիշտ ուղղուց: Այն ժամանակ ես չէի հասկանում, թե այդ ինչ ուղղու մասին է խոսում: Բայց հիմա կարեւորը դա չէ, այլ այն, որ Նիկոլին ինձ մոտ հայհոյող Վովան հանցակից լինելով Նիկոլին, համակարծիք է եղել այն հրեշավոր ծրագրին, որի համաձայն պետք է զոհել մի քանի հազար երիտասարդի, որից հետո վախի եւ սարսափի մեջ գտնվող հանրությունը կողջունի վարչախմբի ցանկացած որոշում, իսկ իրենք էլ հանգիստ կմարսեն կատարվածը:
Այլ կերպ ասած, կհայտարարենք, որ Շուշին տալով փրկեցինք 25 հազարի կյանք: Զոհեցին մեր լավագույնն 18-20 տարեկաններին, զոհեցին այն հայրենասեր տղերքին, որոնք որպես կամավոր շտապեցին մարտի դաշտ, չպատկերացնելով, թե ինչ արյունոտ ու հրեշավոր ծուղակի մեջ են ընկնում:
Դա եղել է հստակ վաղօրոք մշակված քաղաքականություն։ Նիկոլը միտումնավոր կոչ էր արել՝ լավագույն տղեքրին բայրաքթարների տակ ուղարկելու։ Նիկոլը շատ լավ իմացել է իրականությունը եւ դա արել է միտումնավոր։ Հիմա սրանք, խաբվելով արտահերթ ընտրությունների արդյունքներից, հանրության շոկային վիճակից, իսկապես մտածում են, որ Շուշին հանձնելուց եւ մեր տղերքին, մեր լույս տղերքին գիտակցաբար սպանելուց հետո մարսելու են եւ շարունակեն ապրել ու կառավարել: Չշշկռվեք, ոչ մարսելու եք, ոչ էլ կառավարելու: Դուք պատասխան եք տալու մարդկության պատմության մեջ չտեսնված այս հանցագործության համար:
Սա պատերազմի հանցագործների խումբ է, որն այսօր Հայաստանում իշխանության է։
«Ճշմարտություն սերունդների համար» նախաձեռնությունը պատրաստում է ծավալուն զեկույց պատերազմի պատճառների, ընթացքի եւ հետպատերազմյան իրավիճակի մասին, բնականաբար, այնտեղ անդրադարձ կկատարվի այս դրվագին, այնտեղ կլինեն զարհուրելի մանրամասներ, զարհուրելի դրվագներ։
Իսկ գուցե՞ հոկտեմբերի 19-ին Նիկոլը հենց այդ նպատակով է հրաժարվել կանգնեցնել. չէր լրացել խոստացված զոհերի քանակը։ Այդքան զոհը բավարար չէ՞ր։ Հոկտեմբերի 19-ին չկանգնեցնելով պատերազմը՝ մենք ամեն օր տվել ենք 100 նոր զոհ։ Մենք 2000 հրաշք տղա զոհել ենք, որովհետեւ Նիկոլը չի ուզել կանգնեցնել պատերազմը։ Մենք 4-5 հազար վիրավոր պակաս կունենայինք, Շուշին մերը կլիներ։ Հավանորեն այդպես էր ծրագրավորված ի սկզբանե։ Ամենայն հավանականությամբ Հայաստանում գործել եւ գործում է ինչ-որ գործակալական ցանց, որը այս արյունոտ դիրիժորի ղեկավարությամբ քանդում է մեր երկիրը, որոշում՝ քանի հազար 18-20 տարեկան տղա դնի Էրատոյի զոհասեղանին։ Նոր ԱԺ-ում ընդդիմության հիմնական եւ գուցե միակ առաքելությունը խորհրդարանում պետք է լինի քննիչ հանձնաժողովի ստեղծումը, որը մանրամասնորեն կանդրադառնա պատերազմին առնչվող բոլոր խնդիրներին: Ուրիշ ճանապարհ չկա։