«Շահրազադը» կալանվեց
Իտալիայի իշխանությունները կալանք են դրել Մարինա Դի Կարարա նավահանգստում խարիսխ գցած «Շահրազադ» շքեղ զբոսանավի վրա: Այն, ենթադրաբար, պատկանում է Ռուսաստանի նախագահ Վլադիմիր Պուտինին:
Իտալիայի իշխանությունների փոխանցմամբ, «ֆինանսական ոստիկանությունը պարզել է, որ նավն առնչություն Ռուսաստանի ղեկավարության շրջանում բարձրաստիճան պաշտոնյաների հետ, ովքեր Եվրամիության կողմից ենթարկվել են պատժամիջոցների»:
140 մետր երկարությամբ նավի գինն, ըստ անկախ աղբյուրների, հասնում է մոտ 700 միլիոն եվրոյի: Նավն անցած ամիսներին վերանորոգման նպատակով գտնվել է նավահանգստում:
Այդ աշխատանքը պետք է ավարտվեր հաջորդ տարեսկզբին, սակայն այս շաբաթասկզբին «Շահրազադը» փորձել է դուրս գալ նավահանգստից:
Իտալիայի իշխանությունները դա կանխել են և հայտնել, որ նավը կմնա կալանքի տակ մինչև դատարանի վերջնական որոշումը:
Ընդդիմադիր լիդեր Ալեքսեյ Նավալնիի զինակիցները հետաքննություն են անկացրել և հանգել են այն եզրակացության, որ «Շահրազադ» զբոսանավի իրական տերը Ռուսաստանի Դաշնության նախագահ Վլադիմիր Պուտինն է:
Մինչդեռ, ըստ La Stampa իտալական պարբերականի, զբոսանավի տերը «Ռոսնեֆտ» ընկերության նախկին սեփականատեր Էդուարդ Խուդայնատովն է:
The Guardian բրիտանական պարբերականի փոխանցմամբ, Իտալիայի ֆինանսական ոստիկանության մի անանում պաշտոնյա ասել է, թե շատ դժվար է պարզել այդ գերթանկ զբոսանավի իրական տիրոջ անունը, քանի որ նավի հետ կապված են շատ մեծ թվով ընկերություններ:
Ուկրաինայի վրա Ռուսաստանի հարձակման կապակցությամբ անցած շաբաթների ընթացքում Եվրամիության երկրկների նավահանգիստներում կալանքի որոշումներ են ընդունվել ռուս միլիարդատերեր Ալեքսեյ Մորդաշովի, Գենադի Տիմչենկոյի, Ալիշեր Ուսմանովի և Վիկտոր Վեքսելբերգի գերթանկ զբոսանավերի, ինչպես նաև անշարժ գույքի նկատմամբ: