Խաչատրյանն անիմաստ է համարում 44-օրյայի քննիչ հանձնաժողովի աշխատանքը, Քոչարյանը մինչդեռ վստահ է՝ կարևոր բացահայտումներ կանեն
«Երբ խաղը մի դարպասի վրա է, և մի թիմ է խաղում դարպասապահի դեմ ընդամենը, ես չգիտեմ՝ ինչ անաչառ, անկողմնակալ և այլն»․ 44-օրյա պատերազմի ժամանակ Զինված ուժերի Գլխավոր շտաբի պետի առաջին տեղակալի պաշտոնը զբաղեցրած Տիրան Խաչատրյանը այսպես է արձագանքում պատերազմի հանգամանքները քննող հանձնաժողովի անաչառության մասին հարցին։
Նա ասում է՝ եթե այնպիսի իրավիճակ ստեղծվի, որ հանձնաժողովի աշխատանքներին իր ներգրավվածությունն արդյունավետ համարի, միանշանակ կմասնակցի։
«Եթե ես պետք է գնամ, էնտեղ ինձ ինչ-որ հարցեր տան, ինչ-որ պարզաբանումներ արվի և դա որևէ իմաստ, նպատակ չհետապնդի, հետագա ազդեցություն էդ ամբողջի վրա չունենա, իմ գնալու իմաստը ո՞րն է լինելու», - ասաց Խաչատրյանը։
Փաշինյանից Հայաստանի հերոսի կոչում ստացած Խաչատրյանը պաշտոնանկ է արվել 2021 թվականի փետրվարի 24 -ին։ Ինչից հետո չորս տասնյակ բարձրաստիճան զինվորականներ պահանջեցին Փաշինյանի հրաժարականը, իսկ վարչապետը դա որակեց ռազմական հեղաշրջման փորձ։
Եթե նախկին բարձրաստիճան պաշտոնյան անիմաստ է համարում պատերազմի հանգամանքներն ուսումնասիրող խորհրդարանական հանձնաժողովի աշխատանքը, ինչպե՞ս է հանրությունը ստանալու պատերազմի հետ կապված բազմաթիվ խնդրահարույց հացերի պատասխաններ, հետաքրքվեցինք Տիրան Խաչատրյանից։ «Այն, ինչ ձայնագրվում, կամ մեքենագրվում, կամ նկարահանվում է, դա էդ պատերի ներսում է մնալու»,- պատասխանեց Խաչատրյանը։
44-օրյա պատերազմի հանգմանքները քննող հանձնաժողովի նախագահ Անդրանիկ Քոչարյանը մինչդեռ վստահ է՝ իրենց հանձնաժողովը կկարողանա շատ կարևոր բացահայտումներ կատարել։ «Ազատության» «Ֆեյսբուքյան ասուլիսին» Քոչարյանն անգամ ասաց, որ աշխատանքներն արդեն սկսված են։
«Զոհվածների երկու ծնողներին, նաև քաղաքական դաշտի անդամներին որոնք, որպես անկախ խորհրդատուներ, մենք ցանկություն ենք ունեցել, որպեսզի իրենք մասնակցեն մեր աշխատանքների ամբողջ ծավալին։ Ասեմ նաև ստացել են շատերը գաղտնիության թույլտվությունները, և նաև մենք այս պահի դրությամբ հսկայական ծավալի նյութեր ենք արդեն ստացել պաշտպանական գերատեսչությունից և մեր փորձագետներն աշխատում են», - ասաց Քոչարյանը։