2020 թ. պատերազմից հետո մեր մեջքը ջարդվեց, բայց… ուղղելու՛ ենք և ուղղելու ենք ո՛չ կենացային տրամաբանությամբ. Աբրահամ Գասպարյանի ելույթը Վերածննդի հրապարակում (տեսանյութ)
Մայիսի 28-ի առիթով Ստեփանակերտի Վերածննդի հրապարակում «Ջենեսիս Արմենիա» -ի կազմակերպած տոնական կենտրոնական միջոցառմանը ելույթ է ունեցել կազմակերպության հիմնադիր Աբրահամ Գասպարյանը։
Նա Վերածննդի հրապարակում հայտնել է.
«...2020 թ. պատերազմից հետո մեր մեջքը ջարդվեց, բայց… ուղղելու՛ ենք և ուղղելու ենք ո՛չ կենացային տրամաբանությամբ, այլ մեր ձեռքը պահելով ժամանակի տեխնոլոգիական զարկերակին, առաջատար մտքին, ռացիոնալ ազգային մտածողությանը: Դա իրականացնելու՛ ենք, հավատա՛, հա՛յ երիտասարդ, հավատա՛ ու աշխատի՛ր, քանի քո մտքում, հոգում ու ձեռքո՛ւմ է հզոր պետություն ստեղծելու բանալին, քանի 104 տարի առաջ հենց քո՛ տեսակը կերտեց պետություն, սխալներով ու բացթողումներով, ճիշտ ու հաշվարկված գործողություններով մեզ ժառանգեց մի բուռ հայրենիք և կտակեց ոչ թե մեռնե՛լ, այլ ապրե՛լ նրա համար»։