Կշարունակեմ պայքարել ՀՀ-ի տարածքային ինքնիշխանության համար. լռեցնելու փորձերը միայն ամրապնդում են իմ վճռականությունը. Փալոունը՝ Բաքվում ցույցերի մասին
ԱՄՆ կոնգրեսական Ֆրենք Փալոունը, որը Բաքվում մասնակցում էր ՄԱԿ-ի կլիմայի փոփոխության COP-29 գագաթնաժողովին, անդրադարձել է իր դեմ անցկացված բողոքի ակցիաներին:
«Չնայած նրան, որ Ալիևը կոշտ ցույցեր է կազմակերպում ինձ խանգարելու համար, ես շարունակելու եմ պայքարել Հայաստանի տարածքային ինքնիշխանության, հայ բանտարկյալների ազատ արձակման և խաղաղության համաձայնագրի համար, որը խաղաղություն կբերի տարածաշրջանին»,- X-ում գրել է Փալոունը։
Նշվում է, որ բողոքի ակցիաների մասնակիցները հետապնդել են Փալոունին թե՛ գագաթնաժողովի ընթացքում, թե՛ հյուրանոցում: Կոնգրեսականը խուսափել է ֆիզիկական վնասներից միայն ԱՄՆ Պետդեպարտամենտի միջամտության շնորհիվ։
Ադրբեջանի նախագահ Իլհամ Ալիևը արգելել է Փալոունին մասնակցել իր և ԱՄՆ Կոնգրեսի անդամների հանդիպմանը: Չնայած Փալոունը հանդիպում էր խնդրել Ներկայացուցիչների պալատի պատվիրակության անունից` նրան հատուկ ցուցակից հեռացրել են։