Իրանը ցանկանում է ամբողջությամբ ու ընդմիշտ վերջ տալ պատերազմին տարածաշրջանում. Արաղչի
Իրանը չի պատրաստվում ընդունել հրադադարի որևէ առաջարկ, և պաշտոնական Թեհրանի համար ընդունելի միակ տարբերակը պատերազմը ամբողջությամբ դադարեցնելն է։ Այս մասին Al Jazeera-ին տված հարցազրույցում հայտարարել է Իրանի ԱԳ նախարար Աբբաս Արաղչին։
Նրա խոսքով՝ թեև մի շարք բարեկամ երկրներ առաջարկում են միջնորդական նախաձեռնություններ, Իրանը չի ընդունում ժամանակավոր հրադադար։ Փոխարենը, Թեհրանը պատրաստ է քննարկել միայն այնպիսի առաջարկներ, որոնք կապահովեն պատերազմի լիարժեք ավարտը, կբավարարեն իր նախապայմանները և կներառեն Իրանին հասցված վնասների փոխհատուցում։
Արաղչին ընդգծել է, որ Իրանը չի ցանկանում իրավիճակ, երբ կարճ դադարից հետո հակամարտությունը կրկին վերսկսվի․ «Մենք ցանկանում ենք, որ պատերազմն ավարտվի ամբողջությամբ և ընդմիշտ՝ ողջ տարածաշրջանում»։
Նա նաև նշել է, որ տարբեր երկրներ կարող են միջնորդի դեր ստանձնել, այդ թվում՝ Չինաստանը, որն արդեն նախկինում մասնակցել է տարածաշրջանային միջնորդական գործընթացների։
Դիմելով ամերիկացիներին՝ Իրանի ԱԳ նախարարը հայտարարել է, որ սա ոչ ԱՄՆ-ի, ոչ էլ Իրանի պատերազմն է՝ այն բնութագրելով որպես Իսրայելի նախաձեռնած հակամարտություն, որի հետևանքներից տուժում են թե՛ տարածաշրջանի, թե՛ ԱՄՆ-ի քաղաքացիները։
The post Իրանը ցանկանում է ամբողջությամբ ու ընդմիշտ վերջ տալ պատերազմին տարածաշրջանում. Արաղչի first appeared on MediaLab Newsroom-Laboratory.