Ատելություն սերմանելը չի կարող անհետևանք մնալ. Նինա Կարապետյանց
«Մեդիալաբի» հարցերին պատասխանում է «Նժար» սահմանադրական շարժման անդամ Նինա Կարապետյանցը
– Տիկի՛ն Կարապետյանց, Սուրբ Աննա եկեղեցու միջադեպի գործով կիրակի ձերբակալված Միքայել Մինասյանը ազատ արձակվեց: Խափանման միջոց է ընտրվել ստորագրությունը՝ երկրից չբացակայելու մասին: Գևորգ Գևորգյանը ևս ազատ արձակվեց, խափանման միջոց է ընտրվել 5 մլն դրամ գրավը, իսկ Դավիթ Մինասյանին կալանավորելու համար միջնորդություն է ներկայացվել դատարան, գործը մակագրվել է դատավոր Մնացական Մարտիրոսյանին: Իրավաչափ համարո՞ւմ եք կատարվողը:
– Ամենաանտրամաբանական, ամենաանհավանական գործն է, որը երևի վերջին շրջանում ես լսել եմ, թեև սպասելի էր: Կապել միմյանց չճանաչող մարդկանց խմբակային հանցագործություն իրականացնելու մեղադրանքով՝ նվազագույնն անտրամաբանական է, բարոյական ու մասնագիտական կողմն էլ բաց եմ թողնում: Նիկոլ Փաշինյանը բոլոր հնարավոր գործիքներով փորձելու է տպավորություն ստեղծել, որ ցանկացած մեկը, որ կհամարձակվի՝ առանց իր համաձայնության կամ նարատիվներից դուրս շնչել, արտաշնչել, պարտադիր կալանավորվելու է: Սա այն տրամաբանության մեջ է, որով Նիկոլ Փաշինյանը պատրաստվում է գնալ ընտրությունների, շատ կանխատեսելի էր:
– Կալանավորման միջնորդությունը կբավարարվի՞:
– Մնացական Մարտիրոսյանը այս իշխանության սրտի միակ դատավորը չէ, արդեն պարզել ենք, որ այս իշխանությունը, ի տարբերություն նախորդների, մեծ թվով սրտի դատավորներ ունի, ու նրանք պատրաստ են ծառայություններ մատուցել Նիկոլ Փաշինյանին: Ինչ-ինչ կոմպրոմատների կամ այլ հանգամանքների գնով նրանք դեմ են գնում օրենքին ու իրենց խղճին:
Մնացական Մարտիրոսյանի պարագայում, ես վստահ չեմ, որ կալանքի միջնորդությունը կբավարարվի, որովհետև նա շատ փորձառու դատավոր է ու շատ լավ զգում է հանրային տրամադրությունները, իշխանության կայունությունը, վերարտադրվելու հնարավորությունը, հետևաբար Մնացական Մարտիրոսյանը շատ ճիշտ կգնահատի այս իշխանությունների վերարտադրության շանսերը, ուզում եմ հավատալ դրան: Կրկնում եմ՝ ավելի անհեթեթ, ավելի անհիմն քրեական գործ դժվար է պատկերացնել:
– Համաձայն չե՞ք հնչող այն կարծիքներին, որ երկրի ղեկավարին փորձել հարվածելը պետք է պատժվի, որ նման դեպքերը պետք է կանխվեն:
– Բոլոր քրեական գործերը, կոնկրետ այս դեպքի մասին չէ խոսքը, պետք է դիտարկվեն ամբողջության մեջ, սա հետևանք է: Հազար անգամ, այդ թվում նաև ձեր հարթակից, մյուս բոլոր հարթակներից բոլորս, ադեկվատության մեջ մնացած իրավապաշտպանները խոսել ենք այն մասին, որ ատելություն սերմանելը չի կարող անհետևանք մնալ, որ սա ի վերջո գեներացվելու է, ու առաջին հարվածը ստանալու են իշխանությունները, իրենք են լինելու առաջին զոհը: Այս պահին իրենք ունեն իրենց խնդիրները լուծելու, պաշտպանվելու համար լծակներ, բայց դա հավերժ չէ, ու իրենց իսկ գեներացրած ատելությունը վերադառնալու է իրենց:
Սա անխուսափելի գործընթաց է, ու ամեն անգամ մենք ստանալու ենք ավելի ծանր դեպքեր, իհարկե դատապարտելի են մարդկանց վրա հարձակվելը, թքելը: Երբ ամենօրյա ռեժիմով պղծվում է ամենը, ինչը հայկական է, չի կարող անպատասխան մնալ, դա ինչ-որ տեղից դուրս է գալու: Առանձին դրվագով չի կարելի նայել կատարվողին, Նիկոլ Փաշինյանը, իր թիմակիցներն ու սազանդարները բոլորիս տեռորի մեջ են պահում, հետևաբար սա չի կարող անհետևանք մնալ, սա զսպանակի պես սեղմվում է, բայց ինչ-որ պահի պատասխան լինելու է, չէ՞, սրան:
– Տիկի՛ն Կարապետյանց, փաստորեն համոզվա՞ծ եք, որ իշխանությունը այս միջոցներով չի կարող շտկել առկա մթնոլորտը:
– Այս իրավիճակը հնարավոր է կանխել միայն մեկ տարբերակով, եթե ունենանք ազգային իշխանություն, որը նպատակ կդնի հանրային համերաշխություն բերել ներսում, որովհետև շատ լավ կգիտակցի, որ այս ատելության մթնոլորտը չի կարող հավերժ լինել: Այս փոխադարձ անվստահությունը, ատելությունը, լարվածությունը միայն կործանման են տանելու, օրենքով կարող են միայն տեռոր անել, բայց իրավիճակ փոխել չեն կարող:
Քրիստինե Աղաբեկյան
MediaLab.am
The post Ատելություն սերմանելը չի կարող անհետևանք մնալ. Նինա Կարապետյանց first appeared on MediaLab Newsroom-Laboratory.