Իրանում ուրանի հարստացում չի լինի, ԱՄՆ-ն կվերահսկի միջուկային գործընթացները. Թրամփ
ԱՄՆ նախագահ Դոնալդ Թրամփը հայտարարել է, որ Իրանը չի իրականացնի ուրանի հարստացում, և Վաշինգտոնը պատրաստ է «սերտ համագործակցել» Թեհրանի հետ։ Այս մասին նա գրել է Truth Social հարթակում։
«Իրանում ուրանի հարստացում չի լինելու»,- նշել է Թրամփը՝ չնայած այն հանգամանքին, որ Իրանի ներկայացրած 10 կետանոց առաջարկում ընդգծվում է նման իրավունքի ճանաչման պահանջը։
ԱՄՆ նախագահի խոսքով՝ արբանյակային տվյալները ցույց են տալիս, որ Իրանի միջուկային օբյեկտների վրա իրականացված հարվածներից հետո որևէ նյութ դուրս չի բերվել։ Խոսքը վերաբերում է 2025 թվականի հունիսին Իրանի երեք միջուկային օբյեկտների ռմբակոծությանը, որից հետո ավարտվեց Իսրայելի և Իրանի միջև 12-օրյա հակամարտությունը։
Թրամփը նաև հայտարարել է, որ, ամերիկյան գնահատականներով, Իրանում տեղի է ունեցել «շատ արդյունավետ ռեժիմի փոփոխություն»։
Նա հավելել է, որ Իրանի նկատմամբ սահմանված մաքսատուրքերը և պատժամիջոցները կթուլացվեն։
Ավելի վաղ ԱՄՆ-ը Իրանին ներկայացրել էր 15 կետից բաղկացած առաջարկ, ինչին ի պատասխան Թեհրանը ներկայացրել էր իր 10 կետանոց տարբերակը։ «Այդ 15 կետերից շատերի շուրջ արդեն կա համաձայնություն»,- նշել է Թրամփը։
The post Իրանում ուրանի հարստացում չի լինի, ԱՄՆ-ն կվերահսկի միջուկային գործընթացները. Թրամփ first appeared on MediaLab Newsroom-Laboratory.