გაეროში აკრედიტებული ელჩები ხურვალეთში გაეცნენ რუსული ოკუპაციის შედეგებს

გაეროში აკრედიტებული ელჩების ჯგუფი იმყოფებოდა შიდა ქართლში, საოკუპაციო ხაზთან მდებარე სოფელ ხურვალეთში, რომელიც მავთულხლართებითაა გაყოფილი. ლათინური ამერიკის, აზიის და აფრიკის 8 ქვეყნის ელჩები ადგილზე გაეცნენ შექმნილ ვითარებას და ინფორმაცია მიიღეს ადგილობრივი მცხოვრების, დავით ვანიშვილისგან, რომლის სახლი მავთულხლართებს მიღმა, ოკუპირებულ ტერიტორიაზეა მოქცეული. უცხოელ დიპლომატებთან გასაუბრებამდე დავით ვანიშვილმა რადიო თავისუფლებას უთხრა, რომ საოკუპაციო ძალების წარმომადგენლები სტუმრებთან ურთიერთობას უკრძალავენ. „ეხლაც დამალულები არიან და ესენი რომ წავლენ, მოვარდებიან, რატომ ელაპარაკებიო. 86 წელია საქართველოში ვცხოვრობ და კაცს არ დაველაპარაკო?!“ - განაცხადა დავით ვანიშვილმა. მან გაეროს წევრი ქვეყნების ელჩებს უამბო, რომ რუსეთის საოკუპაციო ძალების წარმომადგენლები ხშირად ეუბნებიან, თუ არ გინდა, ადექი და გადასახლდიო. „სად წავიდე, აქ არის ჩემი მშობლების და და-ძმების საფლავები. აქ არის ჩემი სახლი და როგორ დავანებო. ასე მეუბნებიან, მაგნაირი სახლები ერთი და ორი არ დაგვიწვამსო“ - განაცხადა დავით ვანიშვილმა. მასთან შეხვედრის და შექმნილი ვითარების გაცნობის შემდეგ უცხოელმა დიპლომატებმა ხურვალეთი უკომენტაროდ დატოვეს. გაეროში საქართველოს მუდმივი წარმომადგენლის, კახა იმნაძის ინფორმაციით, საერთაშორისო ორგანიზაციაში აკრედიტებული ელჩები საქართველოში ყოველწლიურად ჩამოდიან და ქვეყანას ეცნობიან. „ამჯერად ჩამოსულია 8 ქვეყნის ელჩი. საქართველოს მიღწევებთან ერთად ეცნობიან გამოწვევებსაც და ბუნებრივია, გვერდს ვერ ავუვლით ოკუპირებული ტერიტორიების საკითხს, რომლის მიმართ მათი ინტერესიც დიდია“ - განუცხადა რადიო თავისუფლებას კახა იმნაძემ. მისივე თქმით. ელჩებმა თავისი თვალით ნახეს, თუ რა სახე აქვს რუსულ ოკუპაციას.