იაპონია საქართველოს სავიზო რეჟიმს უმარტივებს და ჩქაროსნულ ავტომაგისტრალს უფინანსებს

დღეს თბილისში გაიმართა საქართველოს და იაპონიის საგარეო საქმეთა მინისტრების, დავით ზალკალიანის და ტარო კონოს შეხვედრა. მინისტრებმა განიხილეს ორი ქვეყნის თანამშრომლობის განვითარების საკითხები, რეგიონში შექმნილი ვითარება, საქართველოს წინაშე არსებული გამოწვევები და ოკუპირებულ ტერიტორიაზე არსებული სიტუაცია.ერთობლივ პრესკონფერენციაზე დავით ზალკალიანმა ტარო კონოს პირველი ოფიციალური ვიზიტი შეაფასა ორმხრივი ურთიერთობების მნიშვნელოვან მიღწევად და საქართველოსადმი იაპონიის უმაღლესი დონის მხარდაჭერად, და განაცხადა, რომ ამ ვიზიტით ორი ქვეყნის ურთიერთობა გადადის თვისებრივად ახალ ეტაპზე. ზალკალიანმა აღნიშნა, რომ საქართველოს და იაპონიას სრული ურთიერთგაგება აქვთ როგორც ორმხრივ, ისე მრავალმხრივ ფორმატებში. „იაპონია ერთმნიშვნელოვნად უჭერს მხარს საქართველოს სუვერენიტეტს და ტერიტორიულ მთლიანობას და მიესალმება ევროპულ და ევროატლანტიკურ სტრუქტურებში საქართველოს ინტეგრაციას“ - განაცხადა დავით ზალკალიანმა. მისი შეფასებით, იაპონიის მტკიცე პოლიტიკური მხარდაჭერა განსაკუთრებულ დატვირთვას იძენს რუსეთ-საქართველოს ომიდან ათი წლის შემდეგ, როცა კვლავ გრძელდება საქართველოს ტერიტორიების ოკუპაცია და მცოცავი ანექსია.


დავით ზალკალიანის ინფორმაციით, დღევანელ შეხვედრაზე შეთანხმდნენ, რომ ერთობლივი ძალისხმევით მოხდება სავაჭრო-ეკონომიკური პოტენციალის უკეთ ათვისება და კერძო სექტორში თანამშრომლობის წახალისება. ზალკალიანის განცხადებით, საქართველოსა და იაპონიას შორის პოლიტიკურ დონეზე მიღწეულია შეთანხმება ორმხრივი საინვესტიციო ხელშეკრულების ძირითად პრინციპებზე და მოლაპარაკების პროცესი სავარაუდოდ, წლის ბოლოს დასრულდება. დავით ზალკალიანმა და ტარო კონომ განიხილეს თავისუფალი ვაჭრობის შესახებ მოლაპარაკების დაწყების შესაძლებლობაც. იაპონიის საგარეო საქმეთა მინისტრმა ქართულ მხარეს გააცნო ახალი, „კავკასიის ინიციატივა“ და მის ფარგლებში საქართველისთან თანამშრომლობის პროექტები. დავით ზალკალიანის განცხადებით, მისასალმებელია იაპონიის მთავრობის სტრატეგიული ხედვა რეგიონის მიმართ და საქართველო მზად არის აქტიური თანამშრომლობისთვის.


ერთობლივ პრესკონფერენციაზე იაპონიის საგარეო საქმეთა მინისტრმა, ტარო კონომ საქართველოს უწოდა მნიშვნელოვანი პარტნიორი, რომელსაც იაპონიასთან აერთიანებს ფუნდამენტური ფასეულობები - თავისუფლება, დემოკრატია, ადამიანის უფლებები და კანონის უზენაესობა. ტარო კონოს განცხადებით, იაპონიამ გადაწყვიტა საქართველოს მოქალაქეებისთვის სავიზო რეჟიმის გამარტივება, რაც ხელს შეუწყობს ხალხთაშორისი ურთიერთობების გაღრმავებასაც. იაპონიის საგარეო საქმეთა მინისტრმა ისაუბრა ტოკიოს ახალ, „კავაკსიის ინიციატივაზეც.“ ტარო კონომ აღნიშნა, რომ აზიის, ევროპის და ახლო აღმოსავლეთის დამაკავშირებელი რეგიონის სტაბილურობა მნიშვნელოვანია არა მხოლოდ თავად რეგიონის, არამედ საერთაშორისო მშვიდობისა და უსაფრთხოებისთვის.


საგარეო საქმეთა მინისტრებმა ნოტების გაცვლით გააფორმეს საქართველოს და იაპონიის მთავრობათა შეთანხმება აღმოსავლეთ-დასავლეთის ჩქაროსნული ავტომაგისტრალის გაუმჯობესების პროექტის შესახებ. დღესვე საქართველოს ფინანსთა მინისტრმა, ივანე მაჭავარიანმა და იაპონიის საერთაშორისო სააგენტოს ვიცე-პრეზიდენტმა, ნორიკო სუზუკიმ ხელი მოაწერეს ავტომაგისტრალის პროექტის მეორე ფაზის სასესხო შეთანხმებას, რომლის თანახმად იაპონია საქართველოს გამოუყოფს 343 მილიონი დოლარის შეღავათიან სესხს. პროექტი ითვალისწინებს აღმოსავლეთ-დასავლეთის ჩქაროსნული ავტომაგისტრალის ერთ-ერთი რთული, შორაპანი-არგვეთას მონაკვეთის მშენებლობას იაპონური ტექნოლოგიების გამოყენებით. მშენებლობა 2023 წელს უნდა დასრულდეს.