კრემლი უარყოფს, რომ, როგორც მაკრონმა თქვა, პუტინის „ოცნებაა“ ევროკავშირის დაშლა

კრემლი არასწორად მიიჩნევს საფრანგეთის პრეზიდენტ ემანუელ მაკრონის შეფასებას, რომ რუსეთის პრეზიდენტ ვლადიმირ პუტინის „ოცნებაა“ ევროკავშირის დაშლა. მაკრონმა გასული კვირის ბოლოს შვედეთის საზოგადოებრივ მაუწყებელთან ინტერვიუში თქვა, რომ პატივს სცემს პუტინს და სურს მასთან თანამშრომლობა, ევროკავშირთან მიმართებით მისი, სავარაუდოდ, ცუდი ზრახვების მიუხედავად. „პატივს ვცემ ვლადიმირ პუტინს და მივეკუთვნები იმ ლიდერებს, რომლებიც ამბობენ, რომ რუსეთთან ერთად უნდა შევქმნათ უშიშროებისა და თავდაცვის ახალი არქიტექტურა - ჩვენ გვჭირდება ასეთი დისკუსია რუსეთთან. მაგრამ ვლადიმირ პუტინის ოცნებაა ევროპის კავშირის დაშლა“, - უთხრა მაკრონმა შვედეთის ტელევიზიას. ამ განცხადებაზე გამოხმაურებისას, პუტინის პრესმდივანმა დმიტრი პესკოვმა 3 სექტემბერს უარყო, რომ პუტინი არ არის კეთილგანწყობილი ევროკავშირის მიმართ. „ჩვენს ინტერესებშია, რომ ევროკავშირში კეთილდღეობა და სტაბილურობა იყოს“, განაცხადა პესკოვმა მოსკოვში ჟურნალისტებთან საუბრისას. მისივე თქმით, პუტინს უკვე არაერთხელ და მკაფიოდ აქვს გამოხატული ეს პოზიცია, რომლის შეცვლასაც არ აპირებს. მაკრონისა და პუტინის ბოლო შეხვედრა გაიმართა ზაფხულში რუსეთში, ფეხბურთში მსოფლიო ჩემპიონატზე, რომელიც საფრანგეთის ნაკრების გამარჯვებით დასრულდა.